Bimenes prepara la IX Fiesta de la Oficialidá

Va agora ocho años que'l Conceyu de Bimenes abrió un frente de batalla al declarar l'asturianu llingua oficial dientro de les sos llendes alministratives. Bimenes foi'l primer conceyu nel que s'esperimentó una estratexa pa forciar la declaración d'oficialidá del asturianu nun momentu en que'l debate pa la reforma estatutaria taba nel momentu más intensu. Al exemplu de Bimenes, qu'abrió estaya un 4 de xunetu de 1997, siguieron los de Casu, Castrillón, Morcín, Llangréu, Teberga, Llaviana y Llanera. Anque los más d'ellos yeren conceyos gobernaos por Izquierda Xunida, fuerza política qu'abanderó'l procesu, en dellos llugares rexistróse'l votu al favor del PSOE y nun d'ellos, el conceyu de Casu, foi precisamente'l PP el que lo fexo posible colos sos votos.

Dempués de toes estes declaraciones d'oficialidá nos conceyos, vieno'l palu, en forma de reforma estatutaria ensin reconocimientu de la oficialidá del asturianu y en forma de denuncia del antiguu delegáu del Gobiernu Fernando Fernández Noval, que consiguió la impugnación de toles declaraciones por nun axustase a derechu. Con too y con ello, dende entós p'acá, Bimenes remembra aquel día organizando una fiesta que llega a la so IX edición.

El programa entama'l vienres 24 xunu na Casa la Cultura de San Xulián cola presentación del del programa d'actos y l'actuación de Toli Morilla, entamando'l programa d'actos el 27 xunu na Casa la Cultura cola esposición: "Humor Gráficu Asturianu" (2ª parte) cedida pola Obra Social y Cultural de Caxastur. El 28 xunu celébrase'l debate "La Oficialidá na reforma del Estatutu" organizáu pola Xunta pola Defensa de la Llingua Asturiana, mientres que'l miércoles 29 Rafael Rodríguez Valdés presenta "El movimientu obreru y la llingua asturiana (1900 - 1937)". El teatru del grupu Telón de Fondo con "Una hora ensin televisión" enllena la tarde del xueves 30, quedando'l vienres pal debate "La escolarización n'asturianu y mirandés" la entrega de premios del VIII Concursu de Cuentos pola Oficialidá del Asturianu y un certame de monólogos cola participación de Milio'l del Nido y Cellero. La fiesta grande va ser, como ye vezu, el primer sábadu de xunetu nel prau de La Vegona, con Feria d'Artesanía y Mercáu de Productos Agroalimentarios y el tradicional pregón, a cargu anguaño de Francisco José Llera Ramo, Caderalgu de Ciencia Política na Universidá del País Vascu y miembru de l'Academia de la Llingua Asturiana. La Misa n'asturianu, oficiada por José Manuel García de Jesús y cantada por "El Corriellu la Pandorga", una exhibición d'entibadores mineros, a cargu del Club Deportivu d'Entibadores del Caudal y una actuación de tonada y Gaita, cola participación de José García, el "Che de Cabaños", Anabel Santiago y Ismael Tomás, van entretener la tarde hasta que llegue de nueche'l conciertu que van facer el grupu de folk electrónico Xera y Los Berrones.