Los vecinos de Mántaras piden que nun se faiga la mina de Salave

Dempués de recibir la refuga más dura por parte del movimientu ecoloxista, el proyectu de la empresa Río Narcea Gold Mines pa facer una mina d'oru a cielu abierto en Salave -conceyu de Tapia- ta acabante d'alcontrar la refuga tamién de los miembros de l'Asociación de Vecinos "Pasadoiro" del pueblu de Mántaras, que ta atiestando colos terrenos qu'emplegaría la mina, y qu'esta selmana presentaron un escritu en rexistru del conceyu de Tapia pidiendo que dende'l Conceyu nunse dea permisu pa la esplotación. Los vecinos defenden que la negativa del conceyu tendría autoridá abonda p'aparar la obra y argumenten pa pidir que nun se-y dea permisu a Río Narcea gold Mines pa entamala la perda de calidá de vida que diba suponer pa Mántaras entero y la perda irrevrersible del patrimoniu cultural y natural del llugar.

La mina d'oru de Salave supondría la creación d'un crater de 600 mts de diámetru na mesma costa del conceyu qu'afuracaría'l suelu hasta llegar a los 200 metros abondantes nos que s'asitia la capa de mineral bono. Xunta ello, la mina precisaría tamién d'un "área de serviciu" na que dir poniendo tolos servicios auxiliares de la mesma, qu'incluyen una escombrera d'ente 120-180 hectárees y la planta de tratamientu de mineral, que pue tomar sobre otros 30.000 metros cuadraos. Too ello nun llugar d'altu valor cultural y paisaxísticu, Os llagos da Silva, que s'asitien talamente na rasa costera, a unos 200 m al Oeste de la playa del Figo y cerca de 2.000 m al Este de Tapia.

La empresa promotora, Río Narcea Gold mines, tien pa ella que la reserva aurífera d'Os llagos de Silva daría pa una campaña de dellos años d'esplotación (anguaño salen de les esplotaciones de Río Narcea en Boinás y Carl.lés cerca de 175.000 onces al añu, colo qu'a un ritmu asemeyáu Salave tendría material pa cerca de diez años). Según los estudios de la compañía, la capa de mineral más interesante asítiase n'horizontal ente 200 y 250 metros baxo'l suelu y presenta una concentración d'oru mui alta, d'ente 8 y 8,6 gramos d'oru por tonelada de tierra.