L’Observatoriu de Política Llingüística critica que los servicios de normalización se financien con subvenciones

L'Observatoriu de la Política Llingüística, grupu qu'axunta a persones independientes de distintos ámbitos profesionales nel seguimientu de les iniciatives que salen del Gobiernu asturianu en materia de normalización, asoleyó esta selmana un comunicáu nel que la plataforma cívica opina sobre la recuperación de la toponimia asturiana, y sobre la situación de los Servicios de Normalización Llingüística municipales.

En primer llugar l'Observatoriu, nel que participen ente otros el sociólogu Francisco Llera Ramo, los escritores Xuan Bello y Xandru Fernández o los políticos Noemí Martíny Gonzalo Olmos, quier espresar "la so gran satisfacción" pola oficialización de los topónimos de los conceyos de Carreño, El Franco y Llanes, tres de l'aprobación de los Decretos correspondientes en Conseyu de Gobiernu del pasáu 21 d'abril, y la so publicación nel Boletín Oficial del Principáu d'Asturies el pasáu 6 de mayu. Los miembros del Observatoriu califiquen l'aprebamientu d'estos trés espedientes de "pasu históricu, llargamente naguáu polos defensores del asturianu, y que pon fin a una trayectoria frustrante de venti años de la Xunta Asesora de Toponimia". Pal observatoriu significa, per otru llau, dar cumplimientu a un aspectu importante del Plan de Normalización del Asturianu. Al mesmu tiempu, l'Observatoriu quier felicitar a los integrantes de la Xunta de Toponimia, que tán faciendo un trabayu rigorosu y intensu, buscando l'acuerdu colos Conceyos y coronando col ésitu'l so llabor. La plataforma cívica anima tamién al Gobiernu a que siga "per esti camín positivu", aprobando más Decretos d'oficialización toponímica y faciendo aplicar esta oficialidá nos usos institucionales de toa mena.

D'otra parte, el comunicáu del Observatoriu quier destacar "l'esfuerzu que dende la Conseyería de Cultura se ta faciendo por impulsar la política llingüística nel ámbitu municipal, fomentando la creación y caltenimientu de Servicios o Oficines de Política Llingüística en diversos conceyos y mancomunidaes, qu'integren la llamada Rede de Normalización Llingüística nos Conceyos". De toes maneres, y recoyendo los diagnósticos y quexes de les partes interesaes, l'Observatoriu ye críticu col sistema que se ta siguiendo pa la creación d'estos servicios, y manifiesta que "la fórmula actual basada na concesión de subvenciones, magar qu'ofrez garantíes de crecimientu de la Rede, nun ye'l camín óptimu, dao que nun ye a asegurar dafechu la estabilidá de los Servicios de Normalización, nin la estabilidá llaboral de les persones responsables, nin tampoco afita una planificación concertada ente la Conseyería y los Servicios". En cuenta de subvenciones que nun garanticen estabilidá a llargu plazu, l'Observatoriu "considera qu'una bona política llingüística nel ámbitu municipal obliga a que'l Gobiernu aperie fórmules más segures, como la de los convenios ente la Conseyería y los Conceyos, qup'afiten un mayor compromisu ente les dos partes y garanticen el crecimientu de la Rede".