Asturies.com ufierta un cantar d'Esnalar, el discu nuevu de Llangres

Asturies.com da la posibilidá güei a los nuesos llectores de descargar un cantar del últimu trabayu de los asturianos Llangres.

Llangres quier ufiertar a tolos sos siguidores, al traviés d'Asturies.com, ún de los cantares con más fuercia del so últimu cd Esnalar. Esti ye'l casu de Carolina, el corte númberu siete d'esti discu que van presentar el próximu vienres trés de xunu nel teatru Maripeña de la Felguera. Nel cantar sentimos tola potencia instrumental de la banda acompañando a la voz d'Esther Fonseca cantando les estrofes picardioses d'esti tema. Pa descargar el cantar namás qu'hai que calcar equí, y pa saber más d'esti grupu que tien el so ñeru na cuenca del Nalón convidamos a visitar la páxina web del grupu remocicada va poco.