La Escuela de Música Tradicional de Llangréu entama unes xornaes sobre música tradicional asturiana

Les xornaes consisten en realidá nunos cursos que van centrase nel mundu de la gaita y el tambor, llendo dende los estilos hasta'l mantenimientu físicu de los instrumentos.

A lo llargo de los díes 4, 11 y 18 d'esti mes de xunu van desenvolvese en Llangréu les II Xornaes de Culturales sobre la Música Tradicional asturiana, organizaes pol APA del Conservatoriu del Valle del Nalón y la Escuela de Música Tradicional de Llangréu. La temática principal de los cursos va ser la gaita y el tambor, vistos dende dos puntos de vista principales, los estilos nos que se desenvuelven y los sos cuidaos y construcción.

Asina tenemos a Chema Fombona, profesor del conservatoriu d'Uviéu, miembru de la banda de gaites de Llangréu y batería de Los Berrones, que va falar sobre "Ritmos del tambor asturianu y la so aplicación a la batería en bandes de gaites". El gaiteru Valentín Fuente va falar sobre Acompañamientu de gaita a la Canción asturiana o asturianada. Sobre cuestiones de mantenimientu va falar Andrés Valdés que va facer un Taller de Mantenimientu del Tambor Asturianu, y Pelayo Fernández que va falar sobre l'Acabáu y Construcción de payueles asturianes. Tornando otra vuelta a les cuestiones más musicales el tamboriteru Manuel Durán va falar sobre'l Tambor Asturianu en toles sos funciones, y Bras Rodrigo va poner clas sobre la Gaita Asturiana nel baille asturianu.

Los cursos van desenvolvese o bien nes mañanes o nes tardes del 4, 11 y 18 de xunu, con una cuota d'un inscripción bien pequeña. Pa saber más detalles o apuntase a los cursos apurrimos el númberu de teléfonu de la organización, 985 67 71 13 o'l corréu electrónicu chusolis@hotmail.com.