El faisán montés, Especie en Peligru d’Estinción

El BOPA d'esti vienres recoyía definitivamente la catalogación del faisán o gallu montés como especie en peligru d'estinción. Cúmplese asina una de les reclamaciones más de vieyo pal movimientu conservacionista asturianu, pero ta por vese si la midida llega a tiempu pa salvar a la especie del so desanicie definitivu.

La decisión de Mediu Ambiente de declarar al faisán montés especie en peligru d'estinción a propuesta de la la Dirección Xeneral de Recursos Naturales, que ta agora puesta a esposición pública y tien un mes de plazu pa presentar alegaciones, vien dempués de décades nes que tolos indicadores pintaron mal pa esta especie tan identitaria de la fauna asturiana. Ello ye que'l faisán montés presenta anguaño unes cifres de población que nun lleguen nin al 50% de les de va venti años, cuando'l faisán montés yá taba nuna situación mui grave. Nesti tiempu la especie estinguióse dafechu en Palencia, Lleón y Galicia, desapaeciendo según los últimos datos, los pocos animales que quedaben na comunidá de Cantabria.

Asturies queda asina como l'últimu llugar onde esti ave resiste, pero contra ella xueguen dellos factores, ente los que rescampla la falta d'arándanos, alimentu natural del faisán, y tamién la xuba de la población de venaos, que compiten directamente pol habitat colos gallos. Amás d'ello, según los espertos, l'añu pasáu viose que la población asturiana d'esti páxaru taba francida en dellos grupos ensin comunicación ente ellos. Ello lleva, a la llarga, a que les posibilidaes de relevu xeneracional mengüen más apriesa, acelerando'l trance final.

Por ello la declaración como especie en peligru d'estinción apaecía como'l finxu al qu'había que llegar por parte de tolos grupos interesaos na conservación d'esti páxaru, que contaben con ella yá pal mes de marzu. La declaración que se fizo efectiva'l vienres supón a fectos prácticos
Que tien de redactase un plan de recuperación de la especie implicando a toles alministraciones asturianes y supraasturianes.