REM dexó Xixón contento

Más de 15.000 persones asistieron en Xixón al gran macroconciertu del branu astur. La banda de Michael Stipe escosó'l papel y dio en Les Mestes un recital nel que repasó prácticamente tolos sos discos, con dalguna concesión pa la galería como cantá-y el cumpleaños a un fotógrafu amigu de la banda.

Puntuales, los REM saltaron al escenariu a la hora prevista y, ensin presentaciones, atacaron col primer tema, "I took your name", un entamu a mediu tiempu del discu de 1994 Monster tres del que vieno What´s the frecuency, Kenneth?, un de los temes más duros de la banda americana enxertu tamién nesti mesmu discu y col que'l públicu enganchó yá definitivamente dempués de la sorpresa que supón la presencia n'escena d'un Stipe nerviosísimu que nun para ni pa garrar fuelgu. Tres de les presentaciones, vieno'l primer lentu, "The outsiders", un tema col qu'entamó'l cuerpu central del conciertu, qu'incluyó dellos temes de los sos discos más celebraos, como y tamién pieces pa los que conocen bien la banda, casu de "SO Central Rain" del discu Reckoning, y "Leave", tema enxertu nel LP New Adventures in Hi-Fi, discu del que tamién cayó la recoleta "Electrolite" mientres que del LP que los fexo famosos n'España, el "Out of time" de 1988 la banda escoyó'l tema "Me in honey". "Star 69" "Leaving New York" o "The one i love" foron dellos de los cantares que sonaron nun conciertu qu'amenazó con estropiar l'agua, pero por suerte namás un cayó un poco d'orbayu. Un Stipe coñón entrugó-y al públicu "Tais moyaos ¿ye por culpa del agua o por culpa nuestra?" Foi una de les munches vegaes en que'l cantante faló col públicu nun inglés mui entendible nel que tamién se congració de tar n'España "por ser ún de los primeros estaos en reconocer los derechos de gais y lesbianes" y sorrayó'l posicionamientu del grupu contra la política del presidente americanu George Bush.

Una parada técnica y vinieron los bises, a los que se presentó Michael Stipe vistiendo la camiseta del Sporting. Foi un final de restallu, cola banda enriestrando los sos temes más conocíos, entamando con "Imitation of life" y llegando al éstasis colectivu cola interpretación del tema más conocíu del grupu "Losing my religion" con mandolina incluyida. Les primeres notes de "Man on the moon" dieron la señal de que REM diba echar el piesllu. Stipe nun pudo contenese y acabó quitando la camiseta mientres daba les gracies y prometía que diben volver. Meyor, dificil.