Francia dixo non a la Constitución Europea

La ciudadanía francesa refugó masivamente la Constitución Europea nel referéndum que se celebró ayeri. Con una participación mui alta, que s'asitió nel 69,47% del censu, el tratáu de la constitución europea namás tuvo un 45,13% de votos al favor, mientres que'l 54,87% de los votantes diéron-y un "non" que dexa coxu'l proyectu de la Constitución Europea.

El resultáu del referéndum francés nun dexa llugar a duldes. Una mirada al repartu del votu per departamentos descubre que'l non pasó como una achapladora pel mapa francés, y ye que namás Bretaña, Loira, l'Alsacia y la Islla de Francia -París y los departamentos que l'arrodien- rexistraron un votu favorable al "sí" amás de dellos departamentos d'ultramar, casu de la Guayana, Guadalupe y Martinica, mientres qu'el "non" gana en tolos demás departamentos.

El procesu de ratificación del tratáu va siguir en tolos demás estaos miembros de la UE. L'unu de xunu la constitución europea pasa tamién referéndum n'Holanda con toles encuestes en contra. España, onde'l referéndum tuvo una participación baxísima de menos del 50% foi'l primer estáu en da-y el preste al tratáu irónicamente redactáu por un francés, Valery Giscard d'Estaign, mientres qu'Alemaña, Austria, Bélxica, Eslovaquia, Eslovenia, Grecia, Hungria, Italia y Llituania ratificaron la Constitución ensin pasala per referéndum. A falta de sabese qué igua van discurrir los xefes d'estáu europeos pa da-y salida a la constitución, el tratáu queda agora coxu dempués de qu'ún de los estaos más fuertes de la UE lu refugare oficialmente. La UE va mandase hasta'l 2009 pol Tratáu de Niza, y ta por vese a qu'apañu se llega n'escosando la vixencia d'esti.

Por de pronto, el resultáu francés, anque previsible, ta acabante d'abrir una crisis política qu'amenaza con ser de les más graves de la V República. El non nel referéndum d'ayeri, que pa munchos medios y analistes foi tamién un non a la xestión del gobiernu, pue facer esbarrumblar munchos de los cargos del gobiernu actual, falándose de la posible dimisión del Primer Ministru Raffarin, al que pue sustituyir la figura n'ascensu de Nicolás Sarkozy, y hasta de la del Presidente de la República Jacques Chirac. A otru nivel, el del sistema de partíos francés, el partíu Socialista, qu'oficialmente pidía'l "si" nel referéndum anque muncha de la so militancia apostaba pol "non" ye'l que presenta mancadures más males de curar. Los partidarios del non, los de la estrema derecha coles sos conseñes nacionalistes franceses y los d'izquierda col mensaxe de que'l trunfu contra la Europa ultralliberal ye posible, festeyen el resultáu.

Ver la prensa francesa de güei:

Liberation
Le Monde
Le Figaro
Nouvel Observateur
Midi Libre
Especial de Radio France