Piérdese una panera nun incendiu en Corvera

La Plataforma pola Defensa del Patrimoniu de Corvera denunció los fechos y diz que-y va pidir al Conceyu una investigación pol incendiu, nel que se perdió una panera de gran valor nun llugar oxetu de polémica pola presión urbanística.

El pasáu miércoles día 25, el fueu destruyó una panera asitiada en Los Campos, conceyu de Corvera. L'asociación "Plataforma pola Defensa del Patrimoniu de Corvera" afirma que la panera que se perdió ente les llaparaes el pasáu miércoles tenía protección llegal como elementu del patrimoniu del conceyu y diz que yera de gran valor etnográficu. El grupu de vecinos y amigos de Corvera da anuncia de que van pidir al Conceyu qu'abra una investigación sobre les circunstancies en que se dio esti socesu, y declararon al respective nun comunicáu de prensa que nel so día'l Conceyu yá-y punxere una multa a la empresa constructora titular de la finca onde ta la panera por tirar en xunu del 2004 una casa mariñana que taba enfrente de la panera, que daquella yá perdiere delles colondres y les puertes.

Al mesmu tiempu, el partíu políticu Andecha Astur diz llamentar l'incidente. Nel mesmu comunicáu, AA diz nun entender la presencia d'una pala municipal retirando los pegoyos que quedaben en pie y desfaciendo asina "les posibles prebes del incidente". L'agrupación diz que va tar sollerte al usu que se-y dea al suelu qu'ocupaba la panera.
Más información na web de la plataforma