Freba óptico hasta la puerta nes Cuenques

El Conseyu de Gobiernu d'Asturies aprebó ayeri un gastu de más de dieciocho millones setecientos pa financiar el contratu pa una rede d'accesu a banda ancho nes cuenques mineres. Alcatel ye la contratista d'esta rede que'l gobiernu diz que va entamase nun plazu de tiempu de dos meses pelos trés conceyos más grandes de les Cuenques. Esta rede de freba óptico va tener dos diferiencies básiques cola de Telecable; ello ye que, en primer llugar, va tratase d'una rede que va llevar la freba hasta la mesma terminal de la llinia en casa del usuariu, al revés que la llinia de freba normal que remata nun noyu del que sal una llinia hasta 'l domiciliu del usuariu final. Per otra parte, esta rede va ser multioperador, ello ye, toles empreses de telecomunicaciones van poder ufiertar los sos servicios al traviés d'ella.

L'alcuerdu pa facer esta rede, que llega nel momentu en que la empresa asturiana Telecable yá ta espardiendo la so rede particular de freba óptico per Llangréu y Mieres roblóse'l 7 de mayu del 2003 coles firmes de los sindicatos SOMA-FIA-UXT y la Federación minero-metalúrxica de CCOO más la del Gobiernu asturianu. La finaciación d'esta rede repártese ente 7,5 millones que correspuenden al Plan Complementariu de Reactivación de les Cuenques Mineres y 12 millones con cargu al Plan Xeneral de la Minería. El Gobiernu asturianu diz qu'esta va ser una rede pionera n'España, con una velocidá básica de descarga de 10 Mbit por segundu.


La contrata especifica que la rede va tener que llegar a tolos llugaresque pasen de los 1.000 habitantes nos conceyos d'Ayer, Bimenes, Cangas del Narcea, Casu, Degaña, Ibias, Llangréu, Llaviana, L.lena, Mieres, Morcín, Quirós, Riosa, Samartín del Rei Aurelio, Sobrescobiu, Teberga y Tinéu, sacantes los núcleos urbanos de Mieres y Llangréu, que ye onde yá llega Telecable.