El Conceyu de Gozón aprebó’l so espediente toponímicu

El plenu del Conceyu de Gozón aprebó na xunta que tuvo esti llunes la propuesta definitiva d'espediente coles versiones tradicionales de los nomes de llugar del conceyu propuestu pola Xunta de Toponimia, organismu del Gobiernu asturianu encargáu d'ellaborar los dictámenes colos nomes de llugar de los conceyos asturianos. Dase la circunstancia de que'l de Gozón ye'l primer espediente toponímicu que s'apreba nun conceyu gobernáu pol Partíu Popular. L'espediente acabante d'aprebase oficializa la denominación billingüe pal nome de la capital del conceyu Lluanco / Luanco y caltién esclusivamente les formes tradicionales en tolos demás topónimos, que faen un llistáu de más de 300. Tolos grupos con representación na casa conceyu de Lluanco (PP, PSOE, IX-BA y AIGO) votaron al favor, colo que l'espediente, aprobáu por unanimidá, queda agora a la espera de pasar per Conseyu de Gobiernu, un trámite pal qu'entovía nun tien fecha acutada pero que va pasar conxuntamente con L.lena y Llangréu, lo más seguro pa enantes del branu.

D'otra manera, la Xunta de Toponimia celebra güei una sesión de trabayu na sede de la Comarca de la Sidra en Paraes (Nava) pa tratar los espedientes toponímicos de los trés conceyos más pequeños de la mancomunidá sidrera: Cabranes, Sariegu y Bimenes. Hasta la fecha, son yá 33 los conceyos que-y tienen solicitao a la Xunta de Toponimia que-yos faiga l'espediente toponímicu, siendo les últimes entraes a la llista les de Parres, La Ribera, Valdés y Miranda.