El Frente Polisariu denuncia énte la ONU la "impunidá" de "los aparatos represivos marroquís"

"El Secretariu Xeneral del Frente Polisariu y presidente de l'autoconstituida República Árabe Saharaui Democrática (RASD), Mohamed Abdelaziz, denunció énte'l Secretariu Xeneral de la ONU, Ban Ki Moon, la ""impunidá"" de la que s'aprovechen ""los aparatos represivos marroquís nel Sáhara Occidental"", según informó esti llunes l'axencia oficial del Polisariu, SPS.

El dirixente saharaui amosó la so sorpresa ""pola decisión, adoptada'l 4 de marzu del 2008 poles autoridaes d'ocupación, de lliberar a dos policíes marroquís implicaos nel asesinatu, n'ochobre del 2005, del ciudadanu saharaui Hamdi Lembarki, tres la so participación en manifestaciones pacífiques n'Aaiún, capital de Sáhara Occidental, en favor del respetu al drechu del pueblu saharaui al autodetermín y la independencia"".

El tribunal marroquí que los condenara a diez años de cárcele nel 2006, según SPS, declarólos inocentes, ""un precedente que protexe entovía más al dispositivu policial desplegáu nun territoriu onde la población entá nun tien drechu a l'autodetermín y que ta na axenda de la descolonización"", sorrayó. ""Llamamos la so atención sobre la impunidá, garantizada a los verdugos escontra les víctimes, qu'anima a cometer más crimes y abusos escontra los inocentes ciudadanos saharauis"", aseguró.

""Les autoridaes marroquís animen a los sos aparatos de seguridá a asustar, a asesinar a los ciudadanos saharauis que sufren les tortures y toa triba de malos tratos y presiones nos territorios ocupaos por Marruecos"", añadió. ""Esti casu confirma la complicidá de les autoridaes de les instancies xudiciales marroquís nesti asesinatu, sobre la base de la falta total de protección a los ciudadanos saharauis por parte de la ONU y de los otros muérganos encargaos de garantizar la llibertá d'espresión y d'aconceyamientu, asina como l'autodetermín, dambos drechos consagraos poles convenciones internacionales"", manifestó Abdelazid.

El cabezaleru saharaui, que pidió a Ban una investigación sobre la muerte de Hamdi Lembarki, desixó'l fin de les violaciones de los Derechos Humanos nel Sáhara Occidental, ""que sigue baxo la protección y el control de la ONU"". Pa ello, sorrayó ""la importancia de poner en marcha un mecanismu internacional, baxo control de la ONU, encargáu de vixilar el respetu de los Derechos Humanos na zona""."