Oposición ecoloxista a la térmica de Lada

La Coordinadora Ecoloxista d'Asturies ta acabante de treslladá-y al al Ministeriu de Mediu Ambiente la so refuga al proyectu d'instalación d'una central térmica de gas de 850 Mw de potencia alimentada a gas natural en Lada (Llangréu) proyectu qu'abandera la empresa Iberdrola y que ta agora mesmo en plazu de consulta de Evaluación de Impacto Ambiental.

Declaráu Zona d'Atmósfera Contaminada nel añu 1984, el Conceyu de Llangréu precisó de Planes de Saneamientu Atmosféricu y de midíes específiques pa menguar los niveles de contaminación que dacuando resultaron curties. Según los ecoloxistes,la entrada en serviciu d'un grupu termoeléctricu nuevu en Lada pue suponer una xuba mui grande de los niveles d'axentes contaminantes presentes n'atmósfera de la Cuenca del Nalón.

Anque dende'l grupu ecoloxista reconocen que les centrales a ciclu combináu suponen una mengua d'emisiones al emplegar gas natural como combustible en cuenta de carbón, alvierten de que l'analís ye precisu facelu dende una perspectiva contestualizada al llugar onde van facese les emisiones,un llugar nel qu'anguaño yá funcionen otros grupos de carbón.

Ello ye que la central nueva allugaríase prácticamente nel centru de Llangréu, un conceyu de 48.500 habitantes y afectando directamente a los 20.000 de La Felguera y los 4.000 de Lada, con bien de cases y equipamientos públicos como la escuela de Turiellos y la de les Dominiques a mui pocos metros de la fábrica.

La central nueva d'Iberdrola emplegaría les antigües instalaciones de Nitrastur, onde'l conceyu tenía previsto de mano facer una operación urbanística, pero foi Iberdrola la que ganó los terrenos nuna puya pública fecha pola Sociedá Estatal de Participaciones Industriales y na qu'Iberdrola puyó más del doble que'l Conceyu de llangréu. Dende'l puntu de vista de la coordinadora, el consentir con esta instalación industrial supón crear un área propia de primeros del sieglu XX que va tarazar les posibilidaes de recuperación paisaxística del conceyu.

Ente los problemes más graves que diba xenerar la central pa los vecinos,los ecoloxistes apunten al ruiu, al altu consumu d'agua y a los vertíos que pueda facer la central al Ríu Nalón.