La CUOTA aprebó’l Plan del Litoral

La Comision d'Urbanismu y Ordenación del Territoriu d'Asturies dio-y el preste ayeri al Plan d'Ordenación del Litoral Asturianu, un documentu que llevaba tramitándose dende l'añu 2002. El Conseyeru Francisco González Buendía diz qu'ello debióse a la voluntá d'algamar un mayor consensu na so redacción.

El documentu del Plan espeya la xestión integrao de tola costa d'Asturies y cuenta con una financiación que s'allega a los 82 millones d'euros, de los que cerca de 9 yá s'invirtieron nos últimos años na creación de caminos costeros, parques-playa o la regulación d'otros aspectos mediuambientales.

El POLA, que llevaba restolando pelos despachos alministrativos dende l'añu 2001 y que pasó a dominiu públicu nel 2004, criticárese muncho nel momentu de la so apaición pol movimientu ecoloxista. Nacíu oficialmente col enfotu de caltener y dinamizar la costa, el POLA presentábase nel so documentu previu como "instrumentu de desarrollu sostenible qu'axunte intereses enfrentaos, la xestión de les trés alministraciones y que socialice la costa permitiendo un disfrute públicu ensin degradar el mediu" contemplando actuaciones nueves sobre playes, creación de caminos pa peatones y paseos, cambeos na rede viaria y creación d'aparcaderos y una zonificación urbanística nueva dafechu.

El POLA incluye tamién trabayos de recuperación de llugares degradaos, un tratamientu especial pa les llinies d'alta tensión que pasen pela costa, un plan d'ordenación de yacimientos arqueolóxicos y otru pa los campings que tan en llinia costera.

Yá de la que se presentó'l Plan, grupos como la Coordinadora Ecoloxista d'Asturies dieron l'alarma. Según el grupu conservacionista, el principal oxetivu del Plan yera'l de xubir la presión turística en tola costa. Les idees que s'enxertaben na presentación previa del plan merecíen toes elles crítiques, entamando pola de facer aparcaderos allegaos a les playes. Lo que pa la Conseyería yera la meyor manera pa desaniciar la presencia d'automóviles atiestando cola arena, pa los ecoloxistes yera una manera d'afayar l'accesu de más de 5.000 coches a les playes, que pasaben a enxertase bien d'elles en "Parques-Playa" una categoría nueva que recibía tamién la crítica verde. Nesti casu, lo que yera una manera d'amestar usos tradicionales con usos d'ociu y espardimientu yera pa los otros una propuesta p'atacar de turistes un total de más del 10% de les playes asturianes, delles hasta agora virxes y que tendríen qu'aguantar una presión humana cada vegada mayor.La construcción de xales y viviendes arreyaes a estos nuevos parques-playa apaecía polo tanto como ún posible efectu secundariu de la masificación turística.

Con too y con ello, el puntu más polémicu del documentu del POLA taba no que denominaba "aprovechamientu deportivu de la costa" un conceptu baxo'l que s'atechaba la posibilidá de construcción de campos de golf en primera llinia de costa.

Ello, y la oposición de dellos conceyos que nun taben d'alcuerdu coles previsiones urbanístiques que mandaba'l POLA llevaron a qu'esti recibiere más de 400 alegaciones a lo llargo de la so tramitación. Anque dende Conseyería nun s'esplicó qu'aspectos de les alegaciones se tuvieron más en cuenta, sorrayose qu'ala fin la Federación Asturiana de Conceyos dio'l so preste unánime al plan.

D'otra manera, la CUOTA aconceyó ayeri tamién con otru importante puntu nel orde del día como son les directrices d'ordenación del territoriu pa los parques eólicos, que van sometese a información público a lo llargo d'un periodu de dos meses enantes de dir a Conseyu de Gobiernu.