El trunfu del bipartidismu

"Colos datos remanaos nel recuentu de votos del 9 de marzu, el PSOE gana les elecciones xenerales, con un total de 169 escaños énte los 153 qu'algama la segunda fuerza política más votada, el Partíu Popular. El total de votos del partíu socialista sumen 11.057.250, cuasi 900.000 más que'l PP.

N'Asturies el PSOE tamién ye la fuerza más votada con 310.319 votos, que representen el 46'26%, dalgo más de cuatro puntos penriba del PP, que llegó a los 282.306 votos, anque dambes formaciones empataron en cuatro escaños. Los cuatro diputaos que representarán al Partíu Socialista nel Congresu serán los mesmos que na pasada lexislatura - Álvaro Cuesta, María Luisa Carcedo, Celestino Suárez y Mariví Monteserín - demientres que pol Partíu Popular foron escoyíos Gabino de Lorenzo, Isidro Fernández Rozada, Pilar Fernández Pardo y Jaime Reinares.

Los partíos nacionales UPyD ya Izquierda Xunida, con ún y dos diputaos respeutivamente, pidieron na nueche del domingu públicamente la revisión de la llei electoral, una llei que, en pallabres del voceru d'IX Gaspar Llamazares, ""respuende a la inxusticia del sistema electoral"" que pa él supón un ""golpe pa la diversidá y la pluralidá"". Llamazares anunció asina mesmo la so retirada pol ""fracasu"" que pa la so formación suponen estes elecciones, ""nun consiguimos lo que queríemos, evitar la bipolarización del país, y asumo'l fracasu personalmente""."