La Universidá protestó contra la privatización y la perda de titulaciones

Más de mil estudiantes y profesores de la Universidá d'Uviéu salieron ayeri a manifestase en contra del Espaciu Nuevu Européu d'Educación superior en rempuesta a la convocatoria de la Federación d'Asociaciones Universitaries. La posibilidá de qu'esta reforma mengüe nun 30% el númberu de titulaciones académiques que se ponen n'Asturies y el mieu que se tien a que la reforma abra un camín a la privatización de la enseñanza superior foron los exes de la protesta, na que tamién participaron un grupu d'estudiantes y profesores, ente ellos Xulio Viejo, Taresa Lorences y Miguel Ramos Corrada, en demanda de la creaciónde la Filoloxía Asturiana.

El Espaciu Europeu d'Educación, que tien d'echar a andar nel añu 2008, enxerta delles novedaes que dende la FAU ven con esmolecimientu. La primera d'elles ye la sostitución del créditu tradicional de 10 hores lectives pol "Eurocréditu" o ECTS qu'equival a 25 hores lectives. Cada cursu, en cualquier titulación, va tener una duración de 60 ECTS. Según les cuentes qu'echen los colectivos universitarios, considerando que'l cursu dura unes 40 selmanes y que 60 ECTS equivalen a 1500 hores, cada estudiante va da dedicá-y a la selmana 37 hores y media a los estudios, cola particularidá de que l'eurocréditu enxerta una estimación de les hores d'estudiu qu'han facese fuera de la universidá,lo que lleva a la contradicción de que, al pagar la matrícula,l'estudiante va pagar tamién poles hores qu'estudia en casa, lo que dexa amás nuna situación mui dificil a los estudiantes que precisen de trabayar pa pagase los estudios, un 30%, según la FAU.

Otra de les novedaes d'importancia del Espaciu Européu ye que desapaecen los actuales conceptos de llicenciatura y diplomatura, pasándose a títulos de Grau y Postgráu. El primeru va durar 3 años, mientres que'l postgrau, qu'equival al segundu ciclu, va durar 2 años. Les antigües llicenciatures pasen a ser "Graos" lo que lleva a entrugase a los colectivos enxertos na FAU si ye posible estudiar en trés años lo qu'enantes s'estudiaba en 5.

Según la FAU, amás d'una perda de calidá, el sistema nuevu va llevar arreyada una universidá más cara, y asina mientres los 3 cursos del grau van tener matrícula a precios públicos, pa los dos del postgrau va ser l'estudiante'l que pague la matrícula entera. Pa facese una idea de lo que supón esto en términos d'incrementu de les tases de matrícula los representantes de la FAU encamienten entrar na web de la Universidá d'Uviéu y analizar atentamente el "Plan Estratéxicu de la Universidá 2005-2010" que nel separtáu 4.4.6 establez la "imputación progresiva de costos reales a usuarios finales" un conceptu que pa la FAU significa la xuba paulatina de les matrícules.

La desapaición de titulaciones, una de les causes de la manifestación d'ayeri, concrétase pa la FAU en 19 de les 58 titulaciones qu'esisten agora na Universidá d'Uviéu. Ente les afectaes taríen les 4 especialidaes de Maxisteriu, Empresariales,l'asimilación de toles inxenieríes superiores coles técniques, delles titulaciones de Filoloxía y los títulos d'Historia del Arte y Musicoloxía.

Pero amás de la desapaición de bien de titulaciones, la llegada d'esti "Espaciu Européu" supón tamién un claru intentu de privatización de la universidá, según denuncien dende la Federación d'Asociaciones Universitaries (FAU) que califíca l'Espaciu Européu d'Educación Superior como "una más de les reformes de calter neolliberal y privatizador qu'entamaron los socesivos gobiernos españoles na última década" La FAU asitia'l puntu de partida pa esta reforma nos años noventa, cuando entamó'l llabor pa facer el que se conoció como "Informe Bricall" que se presentó nel 2000 y que valió de llibru blancu pa ellaborar la Llei Orgánica d'Universidaes (LOU). Esti informe yá encamentaba la creación d'un impuestu universitariu como fórmula de financiaciamientu que consistiría nun recargu nos impuestos de la totalidá de los antiguos estudiantes universitarios y el desaniciu del conceptu de beca pa sustituyilu pol de Empréstamu-Beca, un sistema col que, según dicía l'informe "los estudiantes fáense más conscientes del costu de la so educación y han esforzase nos estudios y nel trabayu, pa ser a devolver el financiamientu recibíu". Tres d'esti informe, vieno la Lleei Orgánica d'Universidaes, que, según destaquen los representantes de la FAU dio otru pasu más camín de la privatización, plantegando a les clares la entrada del capital particular na universidá, a la que facultaba pa poder celebrar contratos con persones, universidaes o entidaes públiques o privaes pa la fechura de trabayos científicos". Agora, l'Espaciu Européu vendría a da-yos carta d'identidá a toos estos procedimientos, enanchando'l so campu d'acción y apurriendo más instrumentos d'acción de la empresa particular na universidá pública.