Los Llagos, pesllaos al tráficu ente xunetu y setiembre

El Conseyu de Gobiernu d'Asturies trató esta mañana'l tema del plan d'accesos a los Llagos de Cuadonga, un espaciu natural que tolos branos sufre graves problemes pol incrementu del tráficu, que llega a estragar la carretera que xube dende la Basílica de Cuadonga hasta los Llagos.


El plan propuestu dende infraestructures pa desaniciar definitivamente estos problemes pasa per torgar l'accesu de coches particulares a la carretera de los Llagos ente'l 12 de xunetu y el 14 de setiembre. A lo llargo d'estos dos meses l'accesu a los Llagos va facese per aciu d'un sistema d'autocares que van facer delles paraes a lo llargo del recorríu y que van tener frecuencies aprosimaes de cinco minutos, según declaró'l Conseyeru de Mediu Ambiente, Francisco Javier González Buendía, que tamién esplicó que'l preciu mediu del paquete conxuntu d'aparcamientu pal coche particular más el billete d'autocar va ser por términu mediu d'unos venti euros pa una familia tipu.

El Parque Nacional de los Picos d'Europa recibió nel añu 2004 un total de 2.221.761 de visites, un 11,6 más que nel 2003, cuando'l parque yá raspió los dos millones de visites. Más de la metada de les visites entraron al parque per Cuadonga, que sigue siendo'l puntu d'entrada al Parque Nacional pel qu'entra más xente, un total d'un millón cien mil visitantes, de los que 332.000 xubieron nel mes d'agostu, lo que da una idega de la gravedá de la situación.