Bateríes de cok, una instalación industrial polémica

La empresa Arcelor ta acabante de dar anuncia de que les bateríes de cok d'Avilés van siguir funcionando hasta l'añu 2017. Los colectivos ecoloxistes avilesinos bramen énte l'anuncia de qu'estes instalaciones altamente contaminantes y que daten d'ente 1955 y 1969 vayan seguir prendíes.

Nesti sentíu, el Colectivu Ecoloxista d'Avilés solicitó información a la Dirección Xeneral de Calidá Ambiental del Principáu sobre les midíes que pue tar incumpliendo la empresa na esplotación de les bateríes de cok, amás d'espresar otra vuelta'l so esmolecimientu éntela posibilidá de que les bateríes de fabricación de carbón siderúrxico puedan siguir abiertes dempués d'esa fecha del 2017. Los ecoloxistes denuncien que, anque la empresa tien conocimientu dende va tiempu de les partes más problemátiques dende'l puntu de vista mediuambiental nel procesu de funcionamientu de les bateríes avilesines, Arcelor nun fexo meyora nenguna nestes instalaciones, que siguen soltando a l'atmósfera grandes cantidaes de polvu y vertiendo a la ría sustancies contaminantes, al dicir del colectivu conservacionista.

El grupu verde avilesín diz que les bateríes nun puen siguir abiertes si primero nun se faen obres de meyora en dellos puntos de les mesmes, ente los que citen los carros de carga del carbón, que lliberen munchu polvu a l'atmósfera y les compuertes y techos de les bateríes, pieces que en munchos casos nun piesllen bien y dexen resquiebres peles qu'escapen axentes contaminantes, un fenómenu que se da tamién colos sistemes d'evacuación de gases, mientres que los vertíos a la ría de la instalación tamién esixiríen un tratamientu especial. Los ecoloxistes avilesinos dicen ue tienen puestu en conocimientu del Principáu les midíes precises p'adaptase a la Llei de Prevención y Control Integráu de la Contaminación, qu'apauta un plazu de dos años pa qu'instalaciones como les d'Arcelor n'Avilés pasen a tar acordies cola normativa nueva.

Finalmente, los ecoloxistes acusen a la empresa de "xugar al tracamundiu" y espurrir al másimu'l funcionamientu en precario de les bateríes de cok mientres obtién d'elles un gran rendimientu económicu. Asina, según los ecoloxistes, Arcelor dio anuncia va tiempu de que nun diba facer meyores nes bateríes porque contaba con pesllales, mientres qu'agora que diz que va siguir con elles abiertes pide que nun se presione a la empresa por esti asuntu porque podría retirar inversiones n'Asturies. El grupu avilesín diz que la presencia de les bateríes ta dañando'l mediu ambiente avilesín y tamién a los empresarios del Parque Empresarial d'Avilés (PEPA) que manifestaron a los ecoloxistes tar asustaos de la cantidá de povisa y polvu que se-yos mete nes sos naves y que vien directamente de les bateríes.