Xixón perdió’l Molín de Viesques

El Conceyu mandó tirar l'edificiu del molín de Viesques, ún de los últimos molinos d'agua que quedaben dientro de la ciudá. L'últimu superviviente, el Molín de la Coría, ta tamién amenazáu.

El Molín de Viesques yera ún de los últimos molinos d'agua que quedaben en Xixón. Esti tradicional molín que l'asociación de vecinos y el mesmu conceyu contaben con remocicar pa convertilu nuna instalación cultural pal barriu pasó a la historia cuando les máquines escavadores lu esfarraplaron el pasáu llunes por orde del Conceyu como puntu final a un procesu de deterioru que llevó a que'l molín se convertiere n'agospiu improvisáu d'indixentes. Namás les mueles de piedra se salvaron, llevándose al Muséu Etnográficu del Pueblu d'Asturies. Los vecinos de Viesques, mal a gustu col derribu, manifestaron la so quexa pol procedimientu que se siguió col molín, pal qu'amás había un proyectu en firme de recuperación patrocináu con fondos de la UE al traviés del programa "la ruta de los molinos" una actuación enxerta dientro del parque fluvial que proyecten la Confederación Hidrográfica del Norte y el mesmu Conceyu de Xixón na cuenca del Piles. Otru de los molinos que se contemplaben dientro d'esta ruta ye'l Molín de la Coría en Ciares (na semeya) que ya ye, oficialmente, l'últimu molín d'agua de Xixón y que presenta un avanzadísimu estáu de ruina.