Izquierda Xunida renueva l’apueste por Jesús Iglesias

La directiva de la tercer fuerza política asturiana volvió a salir escoyida pa otru mandatu, afogando les voces crítiques que llegaron a presentar dos candidatures alternatives. Sicasí la directiva de Jesús Iglesias salió namás col 64% de los votos, consiguiendo los críticos d'Uviéu con Francisco Asís a la cabeza'l 19 % de los votos n'asamblea y los críticos llangreanos, que teníen por candidatu al conceyal de Llangréu Alejandro López y a dellos representantes del sindicatu CCOO, el 15%. El sector oficial quedó asina con 45 de los 70 puestos del conseyu políticu, nel que van tener puestu xente como'l conseyeru Javier García Valledor, la diputada Noemí Martín, o la conseyera de vivienda Laura González. La candidatura uvieina faise con 14 puestos na directiva y la tercer vía llangreana consigue 11 representantes. El nuevu conseyu políticu aprebó la xestión de Jesús Iglesias col 70% de los votos, correspondientes a los sos representantes, mientres que 12 representantes del grupu de Francisco Asís votaron en contra y 8 de la llista d'Alejandro Fernández optaron por abstenese.

Dempués de vueltu a escoyer pa llevar el mandu n'Izquierda Xunida, Jesús Iglesias centróse a importancia que tien pa la coalición la llegada d'equí a la vuelta poco del procesu de reforma estatutaria. Iglesias declaró que l'asturianu tien nesta reforma la so última oportunidá declarando que la "oficialidá ye agora o nunca" y amestando que, en casu de nun ser, "caminaríemos hacia la desaparición del asturianu y entós diba haber que pidir responsabilidaes históriques".