El Sporting aburrió

Na vuelta d'Isma al equipu titular dempués d'años recuperándose d'una lesión que paecía nun tener final, el Sporting y el Xerez firmaron un partíu ramplón qu'acabó ensin goles.

La presencia d'Isma na defensa del Sporting foi la única noticia d'un partíu qu'aburrió enforma a la xente que decidió dir a pasar la tarde al Molinón. El xuegu nunca foi sueltu, y los dos equipos allancáronse nun tran-tran del que nun podía salir nada guapo. Si acasu, el Xerez punxo un poco más de rixu que'l Sporting, con delles intervenciones de Mena que punxeron n'apuros a Sastre, el so marcador na tarde d'ayeri. Pela parte del Sporting, el peligru mayor vieno nun posible penalti a Dorado, que l'árbitrio señaló fuera del área, tirándose la falta ensin peligru pa la meta xerezana. Nel segundu tiempu, el Sporting intentó apertar algo, dominando'l xuegu pero ensin precisión, mientres que'l Xerez buscó la velocidá de la so salida a la contra. Arthuro tuvo dos ocasiones, mandando la mas evidente de les dos al palu, mientres qu'Ismael picó'l balón demasiao alto. La entrada de Gerardo y Bauzá por Calandria y Borreguero nun aportó demasiao.