Los mineros canten a la mina

Esti ye'l títulu del discu que ta acabante d'espublizar la
casa de discos Ámbitu. El conteníu del discu ye talamente lo que
diz el títulu, mineros echando tonaes que traten
sobre la mina. El resultáu final ye un discu de tonada y un perguapu homenaxe
al trabayu mineru.



Al bon conocedor de la tonada asturiana nunca se-y diba ocurrir dicir
que tolos discos de tonada son casi iguales. Si echamos namás qu'una
mirada superficial a esti xéneru podemos llegar a esa conclusión
equivocada, pero conque xorrasquemos un poco podemos dir descubriendo na tonada
matices, diferencies y dificultaes pa decatanos que tenemos delantre un forma
de cantar mui especial. Pero pa poder descubrir too esi mundu son necesarios
discos como esti Los mineros canten a la mina.



El discu ñaz col envís de ser un homenaxe a la mina y los
sos trabayadores. La tonada como homenaxe musical ye una bona elección,
yá qu'esta siempre tuvo mui presente na vida de los mineros asturianos.
Ello ye que nel discu canten, como adelanta'l títulu, mineros, dalgunos
xubilaos, prexubilaos o n'activu, como ye'l casu d'Hérmogenes
Fernández del Pozu Maria Luisa de Llangréu, que grabó nel
discu dos cantares como'l restu de los sos compañeros nel cd. La
nómina de cantantes completase con Graciano Fernández
"Cholín" de los pozos La Encarná y Venturo en
Samartín de Rei Aurelio, Vital Noval del Pozu Polio de Mieres,
José Manuel García del Pozu Nicolasa de Mieres, Juan Antonio
García del Pozu San Antonio d'Ayer y Generoso Fernández del Pozu
Santiago, tamién nel conceyu d'Ayer.



Les voces d'esti discu nun van acompañes por nengún
instrumentu, colo que tenemos una tonada pura, desnuda y directa que sigue los
cánones clásicos. Elimináronse posibles igües,
instrumentaciones o modificaciones, pa que nos quedara al final un discu de
tonada de la llinia más clásica, pero que sirve perfectamente pa
facer un homenaxe sinceru a una actividá como ye la minería que
cada vez tien menos puxu n'Asturies. Cantares como Dientro de la negra mina,
L'ayerana, En lo más alto del pozu o Como la máquina baxa,
fálennos de la vida, los sentimientos y los peligros del trabayu na mina
que tantes vides marcó nesti país. Asina, con esti Los mineros
canten a la mina, tenemos un pequeñu furacu pel que mirar a les cuenques
mineres y les sos xentes.