El Farho Xixón Baloncestu en caída llibre tres perder col Caja Rioja

"El Farho Xixón Baloncestu sofrió la tercera derrota siguía, nesti casu nel so campu de forma mui nidia escontra'l Caja Rioja pol resultáu de 69 a 81.Colos resultaos de la xornada los xixoneses pasen a a ser cuartos na clasificación. L'equipu asturianu ta en caida llibre y el cuerpu técnicu nun pue dicir que esti añu nun hai plantiya y que nun se cambiaron los xugadores mancaos o que nun dieron el resultáu que s'esperaba d'ellos. L'entenador tien muncho que dicir nesto y agora yá nun se puen cambiar más xugadores nin hai más escuses, asina que'l prósimu cambiu ye fácil ver onde va tar de nun camudase les coses yá bien ceo, y el prósimu partíu tal y como tán les coses nun ye'l meyor pa ello, pues van xugar al campu del Vic que ye quintu coles mesmes victories.

El xuegu colectivu nun funciona y esto vien pasando tola temporada y l'equipu caltiense gracies a les individualidaes y la calidá de dalgunos xugadores. Un exemplu d'ello ye'l casu de Matt Kiefer que nun tuvo'l so día y asina les coses pónense mui complicaes, amás l'otru americanu hai tiempu que ta desapecíu pal xuegu - ¡Cómo nos recuerda la situación de Wolfram a la que se viviera na otra etapa na que tuvo nel equipu xixonés! Siempres con mancadures na segunda parte la lliga-.

Nel alcuentru col Caja Rioja los asturianos foron una caricatura d'equipu, namás que les individualidaes foron les que tiraron del carru, asina foi Curtis Bobb, con dos triples siguíos, el que cuasi mete a lo asturianos nel partíu nel últimu cuartu.

Falando del desendolque de alcuentru hai que dicir que foi nel segundu cuartu cuando los rioxanos algamaron una ventaya que los diba tener yá tol partíu delantre nel lletrónicu. Un parcial de 0 a 14 llevó'l marcador d'un 22 a 19 a un 22 a 33, y colos dos xugadores americanos locales nel bancu, pues, anque teníen Kiefer dos personales y Wolfram trés, l'entrenador nun consideró sacalos pa parar la sangría de puntos que se taba dando nel campu. Tuvieron tol cuartu sentaos nel banquiellu y Kiefer salió tres el descansu y Wolfram a cuatro minutos y mediu pa finar el tercer cuartu. Yera muncha la ventaya que se diera a los rioxanos, qu'amás xugaben con muncha velocidá ya anticipación. Al descansu llegóse con un 34 a 45.

Nel tercer cuartu la ventaya llegó a ser de diecisiete puntos, 40 a 57, que foi cuando l'entrenador local mandó otra vez al campu a Wolfram, pues l'alcuentru diba camín de ser una derrota llaceriosa. El caberu cuartu emprimó colos locales doce puntos abaxo, 47 a 59, y en dellos momentos paecía que podía llevantase'l partíu, frutu de les individualidaes, nesti casu de Curtis Bobb, llegando a ponese a seis puntos, 53 a 59, entós l'entrenador rioxanu Jesús Sala pidió tiempu muertu pa tarazar la remontada local y valió-y, pues la ventaya del Caja Rioja volvió a ennachase y mantenese hasta'l final ente los nueve los dieciséis puntos.

Hai de destacar el gran partíu de Stevie Johnson que foi imparable a lo llargo tol alcuentru, tanto nel ataque como na defensa, pues los pivots locales nun podíen echa-y una galga, acompañáu nel so trabayu por Wells ya Hilliman, que tamién ficieron un bon alcuentru. Johnson tuvo una valoración de 48 puntos, metiendo 29 puntos, garrando 15 rebotes, dando 5 asistencies y recuperando 4 balones, poniendo 2 tapones y recibiendo 4 faltes pesonales. Nos asturianos el xugador más destacáu foi Curtis Bobb con 19 puntos, 4 rebotes y una valoración de 12 puntos.

Ficha técnica:

Farho Xixón Baloncestu: Rubén Suárez (5), Sony Vázquez (1), Curtis Bobb (19), Brando Wolfram (5) y Matt Kiefer (8). Tamién xugaron: Adrián García (6), Chus Pineda, José María Balmón (11), David Jandl (5) y Logi Gunnarsson (9).

Caja Rioja: David Mediano (5), Michael Wells (14), Mantas Simonavicius, Alberto Rodríguez (11) y Stevie Johnson (29). Tamién xugaron: Ibon Carreto (8), Alberto Antón, Albano Martínez (2), David Navarro (3) y Patrick Hilliman (7).

Árbitrios: Jordi Feixa y Francisco José Velasco.

Nengún de los dos equipos tuvo xugadores eliminaos por cinco faltes personales.
Partíu de la ventésima tercera xornada de la Lliga Adecco LEB Plata, xugáu nel Palacio de los Deportes de La Guía cola asistencia d'unes mil persones.

Parciales per cuartos: 18-17, 16-28, 13-14, 22-22."