Telecable cumple 10 años

La empresa asturiana de telecomunicaciones cumple 10 años y espubliza una edición nueva del barómetru de telecomunicaciones en que la filial d'Hidroeléctrica asítiase como única alternativa con pesu énte Telefónica nos conceyos en que da cobertura.

Según esti barómetru de Telecomunicaciones d'Asturies, Telecable sigue arrampuñándo-y cuota de mercáu a Telefónica nos conceyos onde llega la so rede de freba óptico, que dende primeros d'esti añu ta entrando per Mieres y Llangréu y que lleva tiempu yá asitiada en Xixón, Avilés, Corvera, Uviéu y Castrillón . No tocante a teléfonu, son yá 31 de cada 100 llinies les que tan al cargu d'un operador que nun seya l'antiguu monopoliu estatal, un porcentaxe que nos conceyos onde llega la rede de Telecable llega al 42%. La TV, el segundu serviciu qu'ufierta Telecable, ye tamién el más demandáu, y asina ye que nos conceyos onde apurre serviciu, el 44,5% de los televisores tan conectaos al cable de la empresa asturiana. No tocante al accesu a internet, el 55,3% de les conexones a la rede nos conceyos en que ye operativa Telecable fainse al traviés de los servicios d'esta empresa, mientres que la penetración de l'ADSL ye namás del 18,6%. Según el barómetru que fexo la empresa Invesmark, nel conxuntu de los 78 conceyos asturianos, los cinco conceyos en que ta disponible'l serviciu de Telecable ponen más conexones a internet de banda ancho que l'ADSL nel conxuntu de los 78 conceyos del país.

Coincidiendo con esti X aniversariu, la empresa dio anuncia de que va xubir la velocidá d'accesu en toles sos conexones a internet. L'acelerón, que va multiplicar les velocidaes d'anguaño por cuatro, va ser progresivu y va dir produciéndose nos distintos llugares onde llega la rede de Telecable d'equí afinales del branu, anque los primeros en notalo van ser precisamente los últimos en llegar, los clientes de les cuenques mineres, nuevu filón d'espardimientu dela empresa asturiana, que yá tien contrataes más de 1.000 llinies solo en Mieres nos meses en que lleva funcionando nel conceyu del Caudal, ello a falta de llegar al branu, onde la empresa suel facer grandes ufiertes de captación de clientes nuevos.

D'otra manera, Telecable, que l'añu 2004 consiguió por primer vegada entrar en beneficios, cuenta con tener esti 2005 un crecimientu del 15% y ponese nuna cifra de negociu de 80 millones d'euros. Anque la empresa va invertir esti añu 34 millones d'euros, la perspectiva ye zarrar exerciciu con ganancia, anque seya simbólica. Con ello, la única ñube prieta qu'apaez nel futuru de la empresa ye la posible marcha d'Hidroeléctrica del Cantábricu del so accionariáu tres de la vienda l'añu pasáu d'HC a la portuguesa EDP.