L’Academia de la Llingua entregó los sos Premios d’Investigación

Ana Cano reivindicó la necesidá d'un local nuevu y más medios pa l'ALLA na entrega d'unos premios nos que munches categoríes quedaron ermes.


L'escritor entreguín Pablo Rodríguez Medina foi l'autor más premiáu nesta edición de los Premios d'Investigación que convoca añalmente l'Academia de la llingua Asturiana. L'autor de "Los taraos" consiguió'l premiu de teatru, un accesit nos premios d'investigación sobre lliteratura asturiana con un trabayu sobre "los porfolios" y el premiu de llectures pa rapazos, esti últimu ex-aequo col collaborador d'Asturies.com Enrique Carballeira.


Antonio Alonso de la Torre ganó en recoyida de material lliterariu oral, y nel de curtios cinematográficos, qu'otres vegaes solía quedar ermu, el ganador foi «Marcha d'echase», de Joaquín Collado. Nun hebo más ganadores, en cuantes qu'en toles demas estayes de la convocatoria de premios de l'ALLA'l primer premiu quedó ermu y los trabayos solo tuvieron calidá abonda a xuiciu de los xuraos p'algamar accesits y reconocimientos de segundu orde. Asina, el premiu "Federico G. Fierro Botas" de recoyida de materia escrito dio accesits a Rafael Rodríguez Valdés, Ramiro González Delgado y José Luis Campal Fernández, mientres que'l de recoyida de material léxicu, el d'investigación llingüística y el de creación lliteraria "Llorienzu Novo Mier" quedaron ermos dafechu.

La presidenta de l'ALLA Ana Cano entregó personalmente los premios agradeciendo-yos a los participantes el so concursu, afalándolos a siguir trabayando nesti llabor qu'enancha'l patrimoniu llingüísticu de tolos asturianos. Ana Cano, que reconoció que les cantidaes que s'entreguen los premios son pequeñes, llamentó como fixere nel día de les lletres que'l presupuestu de l'ALLA tea conxeláu y que la institución nun cuente nin con una sede digna pal desarrollu de les sos actividaes.