IX-BA-LV queda ensin diputáu n'Asturies

"La candidata al Congresu los diputaos por IX-BA-LV, Laura González, fizo esti domingu una valoración de la decisión de Gaspar Llamazares de renunciar a la reelección como coordinador xeneral de la coalición. González aseguró que ""toos en Izquierda Xunida son responsables del fracasu que quixo asumir Llamazares"".

González dixo que ta a la espera de la rempuesta del so partíu énte la perda de trés diputaos a nivel nacional. La vocera de la coalición llamentó los resultaos n'Asturies, calteniendo l'ausencia d'escañu que quedara afitada nel 2004. ""Llamazares dixo que va convocase una Xunta y Asturies tien un pesu perimportante nella, polo qu'hai qu'esperar a ver qué pasa"".

Laura González nun escondió la tristura pol ""mal resultáu"" y repitió les crítiques hacia'l bipartidismu y el sistema electoral que yá espresara Gaspar Llamazares, dende'l puntu de vista d'IX ""la llei electoral perxudícanos sobre manera, porque dempués d'algamar cuasi un millón de votos vemos como partíos nacionalistes tienen más diputaos que nós con sólo 250.000"". Sicasí, sorrayó el ""mal resultáu"" electoral, col que tendrán más dificultaes pa ""sacar alantre un programa d'izquierdes que fai muncha falta nel país""."