Riopedre diz que la estabilidá del profesoráu d’asturianu depende de Madrid

El Conseyeru d'Educación dixo esti vienres na Pola Siero qu'hasta qu'el Ministeriu d'educación nun reconoza l'asturianu como especialidá educativa nun va poder entamase dende Asturies midida nenguna d'estabilidá pa meyorar les condiciones de los interinos que dan clase d'asturianu. El Conseyeru nun aclarió si dende la so estaya de gobiernu se taben dando pasos nesti sentíu.

La rempuesta de Riopedre a la entruga d'Asturies.com fízose nel marcu d'una rueda de prensa previa a la entrega de premios a los escolinos ganadores nos concursos lliterarios n'asturianu de la Selmana de les Lletres y na que se presentaron los materiales de la campaña de matriculación n'asturianu y gallego-asturianu qu'entama la Conseyería de Cultura.

Respective a la campaña de sensibilización pa la matriculación n'asturianu Riopedre, que compareció acompañáu pol xefe de política llingüística Ramón d'Andrés y pol Director Xeneral de Promoción Cultural Carlos Madera, dio una llectura en positivo de la evolución de la enseñanza del asturianu nos 21 años en que lleva impartiéndose nes escueles del país. Nesti sentíu, Riopedre declaró que l'añu pasáu escoyeron l'asignatura 14.635 escolinos nes escueles de primaria y 3.631 alumnos y alumnes de secundaria, unes cifres que calificó de mui bones, anque reconoció que nel bachilleratu ye preciso facer un mayor esfuerzu d'implantación de l'asignatura.


Pa ello entámase esta campaña que parte con un presupuestu de 60.000 euros y que va a repartir 1.800 carteles y 25.000 dípticos en 465 centros públicos y concertaos, amás de poner cuñes en radio, anuncios en prensa y nos autobuses de llinia urbanos y interurbanos d'Asturies. La campaña va facese paralelamente n'asturianu pa la mayor parte del territoriu asturianu y en gallego-asturianu pa los conceyos del Navia-Eo.