Cuestionen la utilidá de Lada-Velilla

La llinia d'alta tensión Lada-Velilla que'l Gobiernu asturianu defende como imprescindible pa garantizar el futuru de la industria eléctrica n'Asturies nun tien el preste de los vecinos de los conceyos pelos que va pasar nin tampoco'l de los colectivos ecoloxistes. Ye'l casu de la Coordinadora Ecoloxista, que diz qu'Asturies tien conexones eléctriques de sobra ensin falta d'esta infraestructura.

La Coordinadora Ecoloxista d'Asturies ta acabante de solicitar énte'l Gobiernu del Principáu d'Asturies qu'acredite porque ye precisa esta llinia d'alta tensión col impactu ambiental que supón y l'altu coste que va tener pa la facienda pública, ello con ser Rede Eléctrica una empresa particular.

Según el grupu conservacionista lleva vendiéndose dende hai yá 15 años la idea de que si nun se fai esta llinia y la de Ribera-Penagos el potencial enerxéticu d'Asturies queda arrequexáu una idea que los ecoloxistes califiquen directamente de "una mentira mas del Gobiernu asturianu que demuestra la falta de planificación de les infraestructures, que namás apuesta por facer obres lo mas grandes posibles ensin importá-y los sos impactos ambientales y los sos costes económicos".

Los ecoloxistes espliquen que la corriente eléctrica nun pue almacenase en grandes cantidaes, polo que namás interesa producila nel intre en que se va consumir. Por ello,dicen que nun tien xacíu falar de triplicar la capacidá de tresportes de corriente n'Asturies cuando "nun va haber quien lo gaste" y argumenten esta idea con datos referíos a los 15 años últimos. Según estos datos, Asturies, que nel añu 1990 xeneró 14.500 Mw/h pasó a 21.000 nel añu 2004, una cifra esta de los 21.000 que lleva calteniéndose estable dende va cinco años y qu'incluso presenta una tendencia a la baxa.

D'otra manera, el consumu internu que se fai d'esta corriente n'Asturies ye de poco más de 1/3 de la producción, esportándose los otros 2/3 a les comunidaes de la nuestra redolada acordies al nivel de les reserves hidráuliques del estáu. La Coordinadora sorraya que tampoco nun hebo problemes d'esportación de corriente cuando en xineru del 2004 la ñeve dexó fuera de serviciu a lo llargo de trés selmanes la llinia de 400 KV que va hasta la Robla pel Puertu Payares. Con tar fuera de serviciu la llinia, Asturies siguió nesi mes con una producción de 1.756 Mw/h que nun hebo problema pa evacuar, demostración bastante pa la Coordinadora Ecoloxista de que nun hai problema nengún de saturación nes nuestres llinies eléctriques al esterior, que son en total 2 de 400 KV y otres 3 de 220kv. Ello arriendes de qu'esiste'l proyectu d'ampliar la tensión de la llinia La Corredoria-Grandas de los 120kv que tien agora hasta los 400kv y llevala hasta la provincia gallega de Lugo.

Per otra parte, los ecoloxistes ven tamién qu'al facer estes llinies pártese del conceptu yá desfasáu col que se trabayaba hasta los años 80 que dicía que yera más barato tresportar la corriente a llargues distancies qu'averar los centros de producción a los centros de consumu, una política comprensible nun tiempu en que yera mas caro carretar carbón que facer una llinia d'alta tensión pero que nun tien xacíu agora que les centrales térmiques a gas puen disponer de combustible en cásique cualquier llugar, faciendo innecesario'l disponer de llinies de tresporte qu'amás de los sos impactos ambientales faen que la tensión caiga un 17% de media dende'l centru de producción al puntu de consumu. Nesti sentíu, Madrid tien proyectaos 20 grupos, Cantabria otros 4 y asina hasta un total de 120 proyectos, munchos d'ellos en llugares hasta agora consumidores de corriente asturiano y que, según la Coordinadora Ecoloxista, nun van precisar de corriente asturiano d'equí a la vuelta d'unos años.


Too ello lleva a la Coordinadora Ecoloxista a acutar al Gobiernu asturianu a dar razones que xustifiquen la necesidá d'esta llinia, al empar que-y piden al executivu autonómicu qu'aparque la imaxe de "comprador de voluntaes" que dicen que ta dando nesti asuntu al ufiertá-yos compensaciones a los conceyos pa que dexen pasar la llinia, compensaciones que nun tienen xustificación "si ye que la llinia ye tan inofensiva como se pretende".