L'ALLA ofrezse a ser ponte pa llograr la oficialidá

El tradicional discursu de la presidenta de l'ALLA nel Día de les lletres entamó acordies a lo que se podía esperar, con una alcordanza a la figura del desapaecíu académicu Manuel d'Andrés Fernández, una bienvenida a los académicos nuevos Marta Mori y Ramón Iglesias Cueva y con un repás al llabor nestos 25 años que cumple la institución académica dende la so fundación nel añu 1980. Darréu d'estos prolegómenos, la presidenta de l'ALLA, ataviada col traxe tradicional asturianu al igual que munchos académicos y asistentes al actu, llamentó que'l llabor normativizador de l'ALLA nun vienere acompañao d'una "política llingüística afayadiza" por parte de les instituciones polítiques. El mal posicionamientu de la llingua nes enseñances, situación de la que responsabilizó directamente al Conseyeru d'Educación, y na Universidá, col procesu de reforma de les titulaciones pendiente d'un filu, ocuparon un bon cachu del discursu d'Ana Cano, que pasó darréu a cuestionar la validez de les midíes de política llingüística del gobiernu, como'l Plan de Normalización, del que dixo que nun pue valir pa tala normalización mientres la llingua nun tenga reconocimientu llegal y qu'amás presenta "pergraves carencies" al nun inxerir "elementos de control y credibilidá".

Ana Cano acusó a la llinia de política llingüística que se vien siguiendo dende'l 2001 p'acá de querer amenorgar les funciones competenciales de l'ALLA, llamentando que dende esi añu la institución nun tien más xuba de presupuestu que la del IPC y qu'amás, mediante procedimientos como'l que sigue la Xunta de Toponimia quier facese de menos a l'ALLA, poniendo en cuestión la validez de les sos investigaciones al proponer formes toponímiques distintes a les qu'acepta l'ALLA. La presidenta esplicó que según la llectura que fai l'ALLA del decretu pol que se regula la Xunta de Toponimia, d'elli nun pue estrayese en conclusión perda nenguna d'autoridá normativa de la institución a favor de la comisión toponímica del Principáu.

Dempués de facer un pequeñu repás a los llogros algamaos nos últimos años nel reconocimientu del asturianu, ente los que destacó'l papel de los conceyos, Ana Cano fexo una propuesta cola que nun se contaba nes previsiones al presentar una propuesta d'alcuerdu social y políticu nen el qu'habríen de participar el Gobiernu asturianu , les fuerces polítiques, sindicatos y organizaciones sociales y culturales en favor de la llingua y la cultura asturianes y que la presidenta de l'ALLA ofrezse a treslladar "a tolos axentes sociales y actuar si asina se me pidiere, como mediadora en tol procesu"

Esta propuesta articularíase en cinco exes, el "reconocimientu del asturianu como llingua cooficial nel Estatutu d'Autonomía d'Asturies", "la concrección de conteníos y plazos pa la so puesta en práctica" un "pautu presupuestariu" sobre esta oficialidá, la "Dignificación, recuperación y divulgación de la cultura asturiana nel ámbitu educativu" y finalmente "l'inxerimientu de l'Antropoloxía y Cultura asturianes dientro de les estayes d'estudiu, investigación y divulgación de la Universidá d'Uviéu".