La Xunta llevó a la cai la demanda d’oficialidá

3.000 persones según la policía municipal
d'Uviéu y 6.000 según la organización convocante
manifestáronse ayeri n'Uviéu en demanda de la oficialidá del
asturianu nel XXVI Día de les lletres asturianes.



Anque la quexa por parte de la Xunta Pola Defensa de la Llingua
Asturiana, organización convocante de la marcha, sobre la esistencia
d'una convocatoria de manifestación paralela por parte del partíu
políticu Andecha Astur punxo un puntu de tensión nos díes
previos a la xornada d'ayeri, la manifestación trescurrió a la
fin con normalidá y con un gran éxitu de convocatoria, cifrando
fontes policiales consultaes por Asturies.com en 3.000 persones l'asistencia,
mientres que la organización apurrióla cifra de 6.000. Ente los
miles de manifestantes qu'ayeri desfilaron per Uviéu hebo
representación de toles estayes de la Xunta Pola Defensa de la Llingua
Asturiana y de partíos políticos como Izquierda Xunida- Bloque
por Asturies, Izquierda Asturiana, Partíu Asturianista o Andecha Astur,
mientres qu'ente les personalidaes que se dexaron ver pela manifestación
tuvieron l'ex-presidente del Principáu d'Asturies Sergio Marqués,
acompañáu pol secretariu xeneral del PAS Xuan Xosé
Sánchez Vicente. La diputada d'IX-BA Noemí Martín o'l
director de Política Llingüística Ramón
d'Andrés foron otres de les personalidaes presentes nuna marcha que
contó col atractivu del bon tiempu y qu'acabó na Plaza'l
Carbayón, a la puerta del Teatru Campoamor, onde la representante de la
Xunta Pilar Fernández lleó como ye tradición el discursu
oficial de la organización nel día de les lletres.



Nel so discursu la representante de la Xunta sorrayó'l calter
d'organización unitaria y apartidista de la organización y
atacó al tueru de la cuestión esplicando que l'asturianu precisa
de midíes urxentes pa que nun se taraze la cadena de tresmisión
xeneracional del idioma. Nun discursu en que se centró n'alertar sobre'l
peligru de supervivencia que cuerre l'asturianu Pilar Fernández
declaró que "Les llingües, amás de señes
d'identidá, son tamién vehículos de comunicación y
si usar l'asturianu nun tien validez na vida real, si l'asturianu nun ta
presente nel usu oficial de les instituciones, nel sistema educativu, nos
medios de comunicación públicos... va ser una llingua
arrequexada, d'andar per casa, condergada a dir diliéndose,
poquiñín a poco". La representante de la Xunta
reconocióla esistencia d'avances normalizadores pero tamién
llamó l'atención sobre'l fechu de que "la velocidá a
la que se pierde l'asturianu ye infinitamente mayor que lo que puedan suponer
esos avances a efectos reales".



Pilar Fernández llevó'l problema a la cuestión del
derechu y denunció que los falantes de llingua "nun tienen los
mesmos derechos que los falantes d'español cuando en cualquier
situación de respetu a los derechos democráticos la
igualdá tenía que ser la norma".



La Xunta responsabilizó al Gobiernu asturianu como entidá
que tenía d'aparar esta situación cola implantación de la
oficialidá de la llingua como únicu preséu pa que nun
seamos los asturianos "ciudadanos de segunda" respective a gallegos,
catalanes, valencianos o vascos, reclamando una "clas política que
tea a l'altura d'esti momentu históricu" que se plantega cola
reforma del Estatutu.



Pa la Xunta, les midíes tomaes por esti gobiernu en
política llingüística son "curties y bien tardones y
fáennos ver un día tres d'otru que toles bones voluntaes acaben
afrellándose contra la muria de la llegalidá, de tal manera que
l'usu del asturianu siempre ye una gracia que nos faen; nunca una fonte de
derechos". La voz unánime d'oficialidá peslló l'actu.

Ver galería de
semeyes