El día grande de les lletres asturianes

L'Academia de la Llingua Asturiana celebra güei n'Uviéu el Día de les Lletres Asturianes, que llega a la so XXVI edición. L'actu va tener llugar nel Teatru Campoamor, tradicional escenariu d'esti actu institucional que suel servir de presentación pública a los académicos nuevos de la institución, honor que-yos corresponde anguaño a Xosé Ramón Iglesias Cueva como académicu de númberu y a Marta Mori d'Arriba en calidá d'Académica Correspondiente. El primeru ye autor de dellos estudios sobre cuestiones d'asturianu y profesor d'enseñanza secundaria, mientres que la segunda ye escritora y collaboradora en bien d'estudios sobre lliteratura asturiana, rescamplando la so collaboración na Historia de la Lliteratura Asturiana espublizada pola ALLA nel 2003.

L'actu, que va contar coles actuaciones musicales del gaiteru José Manuel Tejedor y del grupu Lliberdón, va presentar tamién una actividá nueva consistente nun homenaxe al traxe del país, polo que l'ALLA encamienta a quien disponga del fatu tradicional que lu lleve esi día "como simbolización del so compromisu cola cultura d'Asturies". Enantes del actu académicu, la Xunta Pola Defensa de la llingua convoca la so tradicional manifestación, que va salir a les 7 de la tarde de la Estación de la RENFE d'Uviéu.

D'otra manera, siguen tamién los actos de la Selmana de les Lletres qu'organiza la Conseyería de Cultura y qu'ayeri vivió ún de los sos momentos centrales col recital poéticu qu'axuntó n'Uviéu a dellos de los meyores poetes asturianos xunta les figures del Nóbel de Lliteratura Seamus Heaney y el Premiu Nacional de Poesía Luis García Montero. Güei, el día delllibru y el discu n'asturianu celébrase con descuentos nes llibreríes del país.