El Farho Xixón Baloncestu despide l'añu perdiendo

El Farho Xixón perdió por 83-72 nel partíu disputáu escontra Los Barrios ná cabera xornada del campeonatu regular, un alcuentru nel que l´equipu xixonés nun xugaba nada. Na clasificación definitiva d´esta estaya de la Lliga LEB el Farho Xixón queda nel puestu décimu y nun entra nos "play-off" pel ascensu a la Lliga ACB.

Agora la preocupación del Conseyu d´Alministración del equipu xixonés ye como pesllar el capítulu económicu de la temporada, colos xugadores ensin cobrar dende hai cuatro meses y coles segures denuncies del aval federativu pela so parte, si nun se paga. Esto ye perimportante, pues amás del posible descensu de categoría, si nun se-yos paga, pue ser un pilancu na formación de la plantiya de añu que vien, en cuantes que munchos xugadores pensaríenlo muncho a la hora renovar o fichar pol Farho Xixón. Per otru llau les negociaciones cola Dirección Rexonal de Deportes pa firmar un conveniu nuevu tán mui alloñaes de llegar a bona igua, y ye que'l club xixonés necesita d´esti órganu unos cincuenta millones de pesetes, mientres que les autoridaes deportives asturianes nun-yos ufierten más de diez.

El partíu dominólu siempres pol C. B. Los Barrios que llegó al descansu con una ventaya de selce puntos y colos mesmos rebotes garraos pol so americanu Walls, dominando esta estaya con claridá. Pente'l partíu los andaluces llegaron a tener una másima ventaya de ventiún puntos.

Dempués del descansu los xixoneses ameyoraron, tando más asitiaos na defensa y asina Los Barrios tuvo más dificultaes pa llograr canastes. Nel tercer cuartu destacó Rubén Suárez col so llabor.

Nel últimu cuartu los xugadores del Farho Xixón averáronse nel marcador hasta ponese a seis puntos, con un 73-67, cuando faltaben tres minutos, pero`l C. B. Los Barrios volvió a metese nel partíu y ésti finó con esos nueve puntos de ventaya pa los andaluces, a los qu'esta victoria nun-yos val tampoco pa metese na llucha pol ascensu al ganar el Cáceres en Murcia.

Nel Farho Xixón Baloncestu los meyores foron Keith Waleskowski (19 puntos, 8 rebotes, 1 mate y 2 faltes recibíes) y Rubén Suárez (12 puntos, 3 rebotes, 2 asistencies, 2 balones robaos y 3 faltes recibíes). Nel Club Baloncesto Los Barrios hai de destacar a Willie Earl Walls (16 puntos, 25 rebotes, 2 balones robaos, 1 mate y una valoración de 33), Aaron Swinson (12 puntos, 11 rebotes, 3 asistencies y 5 faltes recibíes) y Federico Van Lacke (20 puntos, 1 rebote, 1 asistencia, 1 balón robáu, 1 mate, 1 tapón y 5 faltes recibíes).

Ficha Técnica:

Club Baloncesto Los Barrios: Rafa Monclova (8), Federico Van Lacke (20), Julio González (9), Aaron Swinson (12) y Willie Earl Walls (16). Tamién xugaron: Jordi Vallmajó (6), Julián López, F. J. Martín (2) y Edward Santana (10).

Farho Gijón Baloncestu: Xavi Vallmajó (4), Chus Poves (8), Saúl Blanco (7), Keith Waleskowski (19) y Tim Young (7). Tamién xugaron: Josep Ortega, Josep Pacreu, Jorge Lledó (8), Rubén Suarez (12) y Antxon Iturbe (7).

Árbitrios: Carlos López Garrido y Javier Millera Mas. Eliminaos por cinco faltes personales, en Los Barrios, Rafa Monclova y Tim Young y Antxon Iturbe nel Farho Xixón. Partíu xugáu nel Pabellón Cubierto Soldado Samuel Aguilar en Los Barrios con unes ochocientes persones nes grades.

Parciales per cuartos: 22-15, 24-15, 20-21 y 17-21.