Día Internacional de la Muyer

"Magar qu'esti añu la campaña electoral y la necesidá de respetar el día de reflexón, adelantaren los actos previstos pal Día la Muyer de les más de les asociaciones, partíos, sindicatos ya instituciones, a nivel internacional ta celebrándose esti día como'l restu los años, aprovechando pa festexar pero tamién pa reflexonar sobre'l papel de la muyer nel mundu.

Si hai unos díes nos facíemos ecu de la campaña entamada por delles ONG ""Muévete pola igualdá"", ye agora la Organización Internacional del Trabayu la que denuncia les condiciones llaborales de la mayor parte de les muyeres. L'organismu internacional caltién que nunca hubo tantes muyeres nel mercáu llaboral, pero que los más de los emplegos que desarrollen son menos productivos que los de los homes, tán mal pagaos y nun tienen protección social, según un informe de la mesma OIT.

L'añu pasáu había nel mundu al rodiu de 1.200 millones de trabayadores énte al 1.800 millones d'esti añu. L'informe señala que les meyores rexistraes nel mercáu de trabayu nun lleguen p'amenorgar el saltu de derechos ente muyeres y homes, según esplicó al esperta de la OIT pa Sudamérica, Maria Elena Valenzuela. ""Les muyeres ganen menos anque desarrollen trabayos equivalentes, tienen más torgues a la hora de llegar a los puestos executivos, y tamién reciben el pesu de la crianza y el cuidáu social"", afirmó la esperta."