Pesllau’l cartel pal Crossroad Festival

El promotor Kike "Louie" y el conceyal de festeyos de Xixón Iván Álvarez Raja presentaron ayeri'l cartel definitivu pa la III edición del Cross Road Festival, que va axuntar ente'l 21 y el 24 de xunetu nos praos de la Universidá llaboral de Xixón lo meyor de la escena rockera del mundu. A falta de conocese los grupos que van poner la prometida presencia asturiana, el festival presenta un cartel d'auténticu restallu cola presencia de 14 artistes ente los que rescampla xente consagrao como Little Richard, que va ser la única oportunidá de velu n'España nesti 2005.

Kike "Louie", responsable y padre del festival, esplicó na rueda de prensa de presentación del certame que'l Crossroad 2005 quier facese más eclécticu abriéndose a otros estilos paralelos al rock clásicu y que comparten el so estilu . En pallabres del promotor "nun van ser too ritmos de cuatro por cuatro" frase cola que xustificó la presencia nel escenariu de los Presidents of the United States, un grupu que fai un rock muncho más abierto que'l de los clásicos y que ye tamién el primer grupu superventes que va pasar pelos escenarios del Crossroad. Con too y con ello, Kike defendió la esencia del certame como un acontecimientu que promociona "l'auténtica música alternativa que se fai agora" aquella que nun cuenta col sofitu de les campañes propagandístiques de les multinacionales del discu.

Nesi apueste pol eclécticismu entren grupos como l'inclasificable Willy deVille o Los Lobos, banda de Los Ángeles-California qu'anduvo pelos caminos del pop, de la música tradicional mexicana y del rock and roll ensin dexar de componer bandes sonores pa películes o incluso facer música pa neños. Más eclécticismu supón tamién la presencia de la Jon Spencer Blues Explosion, grupu que formen Jon Spencer, Russell Smith y Judah Bauer, y qu'amiesta'l punk, el rythm and blues o'l hip hop nun soníu propiu que foi evolucionando a lo llargo de los siete discos que lleven espublizaos. Con dos guitarres y ensin baxu, los sos directos pasen por ser de los más potentes del momentu.

D'otra banda, el clasicismu queda de la mano de grandes músicos ente los que rescampla Little Richard. Consideráu por munchos como'l rei del rock - un títulu que munchos dicen que-y quitó Elvis porque Richard nun yera blancu- Richard ye'l compositor de munchos títulos de la época dorada del rock, casu de Long Tall Sally, Tutti Frutti, Good Golly Miss Molly o Lucille. El cartel complétase cola presencia de la presencia del contrabaxu de los Stray Cats, Lee Rocker, presentando Blue Suede Nights, el so tercer trabayu en solitario. El canadiense Colin James, ún de de los principales renovadores del blues, ye otra presencia destacada nun cartel en que tamién tan The Stepbrothers, el bluesman neoyorquín Lucky Peterson, el grupu de rock finlandés Eero Raittinen & the Noisy Kinda Men, King Wolf and The Hound Dogs, Creole Cats y los arxentinos Superratones.

Más información na web del festival