El referendum pola oficialidá apaez nel debate de la reforma del estatutu

Según una información recoyida ayeri nun diariu asturianu, el caderalgu de derechu alministrativu de la Universidá d'Uviéu Leopoldo Tolivar Alas propón nun informe que redactó como miembru del comité de sabios que tan asesorando al Gobiernu asturianu nel procesu de reforma del estatutu d'autonomía, que, en casu de producise una hipotética oficialidá del asturianu na reforma estatutaria, sedría conveniente facer una consulta popular sobre una midida que podría resultar "polémica".

Asturies.com púnxose en contactu con Tolivar Alas pa conocer de primera mano los pormenores de la propuesta de Tolivar Alas, pero'l caderalgu de derechu esplicó a esti mediu que la información apaecida ayeri sobre'l so documentu yera productu d'una "filtración indebida" y qu'elli entovía nun tenía autorización pa poder facer comentarios nin dar esplicaciones sobre'l conteníu d'un documentu qu'oficialmente entovía nun pue facese públicu. Tolivar, que nun desmintió tampoco la veracidá de la información apaecida, pidió esperar a una autorización nes próximes selmanes pa poder dar esplicaciones sobre la so argumentación, aclariando que, en cuantes pudiere, taría encantáu de poder falar y esplicar los términos de la so propuesta sobre reforma estatutaria p'Asturies.

Sicasí, el conteníu de la información filtrada nun sentó bien ente representantes de la cultura y la llingua asturianes. Les fontes que pudo consultar Asturies.com reaccionaron claramente a la escontra de la conveniencia de facer nengún tipu de referéndum o consulta sobre la oficialidá del asturianu. Asina, la presidenta de l'Academia de la Llingua, Ana Cano, comentó que "nes sociedaes democrátiques los derechos nun son materia de referéndum, como demuestra'l fechu de qu'en nenguna otra comunidá autónoma se fexo referéndum pa reconocer la oficialidá de les sos llingües, un pasu pal que namás foi preciso aplicar la llegalidá constitucional. De cualquier manera, Ana Cano foi mui clara al dicir qu'ella nunca diba oponese a que se ficiere un referéndum, siempres que se dieren les condiciones básiques de llibertá d'espresión y respetu a los derechos democráticos. La presidenta de l'ALLA esplicó que, en casu de facese un referéndum el resultáu "diba ser positivu" pal asturianu, como yá espeyen los datos de les encuestes sociollingüístiques de Francisco Llera Ramo, anque "evidentemente'l someter a consulta popular un derechu diba suponer un casu escepcional y discriminatoriu".


Más rotundu nesti estremu foi Xulio Casado. El representante de la Xunta Pola Defensa de la Llingua Asturiana, a falta de que la so organización faiga una valoración sobre esti asuntu, comentó a títulu personal que nun vía posible la cuestión del referéndum porque según elli "el referéndum yá se fizo al aprobase la constitución nel añu 1978, onde diz que toles llingües habrán ser oficiales nos sos respectivos territorios". Casado calificó la propuesta de "referéndum trampa" y de "política ficción" en cuantes qu'Asturies "tampoco nun tien mecanismos llegales nin autoridá pa convocar un referéndum".