Matrícules asturianes

Juan Antonio Fernández de Sevilla, presidente de l'Asociación Nacional de Fabricantes d'Automóviles (ANFAC) declaró va delles selmanes a medios especializaos delautomóvil que la solución final a la polémica pol enxertamientu de distintivos autonómicos nes plaques de los coches va consistir na presencia "por defectu" del distintivu nes matrícules. Casu de querer retirar l'usuariu esi distintivu, nun tendría más qu'encargar unes plaques nueves ensin les lletres identificatives, operación que-y costaría sobre 18-20 euros.

La solución que posíblemente s'aplique d'equí a poco dexa contentos a los partíos políticos nacionalistes, primeros interesaos en recuperar les iniciales autonómiques que se perdieren nel añu 2000 cola entrada del sistema nuevu de matriculación, mientres que'l sector del automóvil mostróse siempres roceanu a recuperar estos distintivos en cuantes qu'entendíen qu'alteriaben los precios de los coches de segunda mano en cuenta de facer precios únicos que valieren pa tol estáu y torgaben amás la venta d'un coche d'una comunidá n'otra. Con esta solución, pola que sedría factible la retirada de la "marca autonómica" los fabricantes y comerciantes de coches dicen que taríen satisfechos.

Dende'l Partíu Popular nun lo veríen tan bien, y el portavoz del PP na comisión de seguridá vial del Congresu Federico Subirón, comentó que "pagar por cmudar la matrícula diba ser yá el colmu". Subirón calificó la hipotética vuelta del distintivu autonómicu de "imposición directa de ERC al gobiernu" y condenó qu'un instrumentu de rexistru del vehículu se convierta nun elementu d'afirmación personal autonómica"

Sicasí, esto nun ye entovía la salida definitiva a la situación de les matrícules, y too depende de les conclusiones a les que llegue un estudiu que ta faciendo la Dirección Xeneral de Tráficu, según comentó'l responsable de la DXT Pere Navarro.