Éxitu del conciertu pola oficialidá

La tarde y la nueche del sábadu n'Uviéu foi nun
abellugu pa los amantes de la música asturiana y los defensores de la
llingua asturiana. N'Asturies.com repasamos lo que pasó nel
conciertu y ufiertamos a los nuesos llectores un completu álbum de
semeyes d'esti Conciertu pola Oficialidá.



Dempués de munchos díes de trabayu, a les siete la tarde
los militantes de Xunta pola Defensa de la Llingua y la Xunta Moza,
organizadores del conciertu, daben los últimos retoques a la carpa pa
que too tuviera perfecto. Cola carpa vacía podíemos ver les
paredes llenes de pancartes con semeyes de les actividaes revindicatives, de
manera que casi teníemos alredor un anuariu de les milenta xeres que
lleva alantre l'asociación a lo llargo l'añu. Tamién
rescamplaben los carteles que yá daben anuncia de la próxima
manifestación del Día de les Lletres Asturianes convocada como
davezu pola Xunta, que va ser el próximu 6 de mayu a les 7 la tarde
dende la estación de la Renfe n'Uviéu.



A eso de les siete y media abriéronse les puertes pa un
públicu numberosu que yá taba esperando dende facía un bon
cachu. Namás entrar la xente podía dir a la barra y tomar unes
botelles de Sidra Choro, llagar ganador del Premiu Andrés Solar nel 2004 por
etiquetar n'asturianu. Tamién taba
preparáu'l puestu con materiales de la Xunta onde se podía dende
mercar una camiseta, un espetu, un chapa, facese sociu o garrar una pegatina
que ponía namás "n'asturianu" y que sirvió a
muncha xente p'adornase y dir más acordies pa la ocasión. Al poco
d'abrir les puertes entamó la música, y el baille, cola
actuación que ficieron a pie de pista'l grupu de baille D'escarpinos,
ellí echaron unos cuantos cantares y bailles pa dir caleciendo
poquiñín a poco. N'acabando ellos, entamaron les
actuaciones nel escenariu grande de la mano de La Bandina, que ficieron lo
meyor del so repertoriu, con dalgunes pingarates del que ser el próximu
discu que ta a puntu salir. Con La Bandina'l públicu arrancó bien
ceo a baillar, lo que fizo que más d'un pensará que nun diba
haber forma d'aguantar tol conciertu si a les 8 la tarde yá taben
baillando d'aquella manera.



Ensin parón, darréu de La Bandina, pasóse al
escenariu B, onde taben les pandereteres de Dulcamara. Cantares asturianos de
panderetes interpretaos por estes moces que fueron pa munchos una sorpresa
agradable qu'esperemos que tenga muncho futuru. De vuelta al escenariu grande
topamos a Felpeyu, qu'actuó sobre les diez de la nueche, hora a la que
la carpa de 1.000 metros cuadraos taba casi enllena, y l'ambiente yera una
mezcolanza de folixa y revindicación. Los felpeyos aprovecharon pa facer
un repertioriu con casi tolos temes cantaos que tienen y un homenaxe a
la Llingua Asturiana y el so
futuru. Nesti puntu yá nun había vuelta atrás, la carpa yera una ferviella de xente qu'escaecía que fuera taben cayendo unos bastiazos
impresionantes, que llegaron incluso a dar problemes dientro la carpa yá
que l'agua escurríase perbaxo y quería entrar pal escenariu.



Darréu de Felpeyu actuó nel escenariu pequeñu Xera,
una de les propuestes novedoses d'esti conciertu. Xera trabayen nun folk
llectrónicu de mano d'un programador qu'amesta el so soníu a una
gaita, un vigulín, una bandurria, un bouzouky y teclaos. Ún de
los momentos más emocionantes de la nueche foi cuando'l gaiteru de Xera-y
dedicó un cantar a la so güela qu'esa mesma nueche taba
debatiéndose ente la vida y la muerte.



Dempués de l'actuación de Xera la Xunta aprovechó
pa facer un pequeñu discursu dende l'escenariu grande. La Pita tuvo
presente nesi discursu onde'l presentador del conciertu, Iyán
González, llanzó la conseña de que "l'únicu plan de
normalización que necesita l'asturianu ye la oficialidá" aprovechando l'intre pa presentar "Fala", el cantar que
va sacar la Xunta pola Defensa de la Llingua Asturiana cola
collaboración del colectivu Músicos pola Oficialidá y la
casa de discos L'Aguañaz.



Con un pequeñu retrasu por problemes col soníu
entamó N'Arba qu'actuó con un públicu entregáu,
que ye onde meyor se revuelven el grupu y el so carismáticu cantante
Ambás, pero al poco l'atención volvió a centrase nel escenariu
pequeñu onde, sobre les dos de la mañana, actuó
K-Nalón. El grupu de Hip-Hop n'asturianu foi una auténtica
novedá y revelación nel conciertu. El rapéu de Tori,
apoyáu nos coros por Arma X de Stoned Atmosphere, y les bases de Ceeris,
engancharon al públicu con lletres combatibles y glayíos nos
que se pidió la oficialidá y nos que se dexó dalgún
recáu enfocicáu p'artistes asturianos d'influyencia rumbera.



Dempués del Hip-Hop de K-Nalón el conciertu entraba na so
faceta más rockera cola actuación nel escenariu grande de
Skontra, que ficieron munchos de los cantares del so últimu discu.
Dempués del hard-rock d'estos xixoneses, actuó p'acabar Skama la
Rede, anque los de Carreño tuvieron d'esperar hasta les cuatro de la mañana.
La xera nun yera fácil, pero Skama la Rede y el so cantante Miguel Fernandi fueron quien a mover a un públicu que llevaba munches hores
de conciertu. Con too y con ello, yeren munchos los siguidores de la banda
qu'enllenaron bus dende Carreño pa venir hasta'l Conciertu pola
Oficialidá y nun se-yos podía dar un disgustu.



Cerca de les cinco la mañana acabó una de les ediciones
del Conciertu pola Oficialidá más multitudinaries. Les cares cansaes de los miembros de la
Xunta miraben pa una carpa onde quedaba muncho por recoyer y llimpiar, pero
tamién s'albidraba un aquello de satisfación nellos
por facer posible qu'otra vuelta miles de persones pudieran de la meyor manera
posible glayar pola oficialidá de la llingua asturiana. Asturies.com
quier ufiertar esti álbum de semeyes del conciertu pa que los nuesos
llectores puedan ver n'imaxenes los sos meyores momentos.