Fernando Alonso gana n’Imola nun final de restallu

El pilotu asturianu Fernando Alonso venía al Gran premiu d'Imola col cartel de favoritu, pero sabíase tamién que Michael Schumacher y la escudería Ferrari, que llevaben selmanes entrenado nesta pista col coche nuevu podíen xugar un gran papel y esconsoñar del mal aniciu de temporada que tan teniendo los coches encarnaos. Sicasí, los entrenos del sábadu destaparon la figura del Mclaren de Kimi Raikonnen como un terceru en discordia qu'amenazaba con poner les coses mui pindies pal pilotu asturianu. El finlandés y l'asturianu acabaron repartiéndose la primer llinia de parriya con ventaya pal nórdicu mientres l'alemán de Ferrari, que se salía de pista, cayía hasta'l puestu 13 de la lista.

El domingu, en prendiéndose'l semáforu verde, Raikkonen salió como un tiru, mientres Fernando, que corría col mesmu motor col que ganare en Bahrein, llimitábase a aguantar el segundu puestu. El finlandes y l'asturianu despegábense de tolos demás pilotos, mientres que l'alemán de Ferrari yera incapaz de xubir puestos nuna pista estrada de baches y na qu'adelantar yera dificil enforma. Sicasí, el panorama diba cambiar bien ceo. El McLaren Mercedes de Raikonnen cedía en menos de diez vueltes y Fernando, nuevu líder, escapábase mientres tres d'elli el sorprendente Jenson Button armaba un tapón curiosu col so BAR-Honda. El panorama diba llevar un bon cambéu cola primera entrada a boxes. El desapaecíu Schumacher, que retrasó tolo que pudo la parada, xubió un bon carráu de puestos corriendo como un degorriu cola pista vacia. El campeón del mundu púnxose terceru y nun tardó en pasar a Button aprovechando'l fallu del inglés al doblar un coche con vuelta perdida. Schumacher retrasó tamién hasta'l tope de la reserva del depósitu la segunda parada a boxes, y, cuando salió, fízolo a dos segundos d'Alonso. Quedaben once vueltes y el duelu taba servíu. El Ferrari apegóse al cambiu del Renault y los dos coches marcharon como dos vagones del mesmu tren a lo llargo de les últimes vueltes. Dacuando, el coche encarnáu salíase de la trazada buscando'l fallu del pilotu asturianu, pero Alonso, que controlaba'l Ferrari pelos espeyos, tapaba'l güecu una vez tres d'otra, torgando'l pasu de la bala encarnada, que podía rodar hasta un segundu y mediu per vuelta más rápido que'l Renault pero que nun alcontraba'l furacu pel que pasar la muria de contención del Renault, anque llegó a ponése-y en paralelo delles vegaes. Asina hasta la bandera de cuadros, qu'Alonso vio'l primeru.