"Ye un premiu a la música asturiana"

Asturies.com faló con Chus Pedro. El cantante amosó les
sos impresiones dempués de ganar el premiu al meyor cantar n'asturianu
de la SGAE.



Chus Pedro, el cantante que'l mes qu'entra cumple cincuenta años,
de los que lleva trenta dedicaos a la música, ta acabante de ganar el
premiu al meyor cantar n'asturianu de l'Academia de la Música. La primer
reflexón que-y sal a Chus Pedro
ye que "primero que nada ye un premiu pa tola música asturiana,
qu'esti añu tocó que me cayera a min. Yo personalmemte tengo
qu'estender el premiu a tol mundu que collaboró nel discu
De
Ñublu y Orpín, y especialmente los collaboradores nel cantar
ganador Agora sal a baillar". Dende la so visión de veteranu de la
música diznos que "puede qu'hubiera xente más mozo que yo
nominaos que-yos ficiera más ilusión que a mi ganar, pero con
trenta años de carrera sigo tando mui contentu de recibir premios d'esti
tipu".



Con too y con ello'l cantante de Nuberu apunta que "el premiu yá
lu recibí l'añu pasáu cuando se creó la
categoría del meyor cantar n'asturianu nestos premios ". Nesti
sentíu quixo facer rescamplar que significa pa él que l'asturianu
tea reconocíu nestos galardones, "cuando ves que l'Academia de
Música trata al asturianu como'l restu de les llingües del
Estáu, paez que te sientes menos como un llocu que canta nuna llingua
que nun esiste, y que te conviertes nun artista más que canta na so
llingua materna como tantos otros faen".



Pal futuru Chus Pedro diz que "esti premiu nun cambia na y que la
meyor manera de celebralo va ser como acostumo a facelo, cantando"