De Lorenzo pieslla la campaña con un mitin espectáculu

"El cabeza de llista del PP al Congresu por Asturies y alcalde d'Uviéu, Gabino de Lorenzo, va pone-y el ramu a la so campaña electoral con un mitin-espectáculu nel que'l propiu De Lorenzo actuará nuna obra teatral xunta'l conocíu actor asturianu Arturo Fernández.

L'espectáculu tendrá llugar mañana a les 20.00 hores nel Auditoriu Príncipe Felipe d'Uviéu y De Lorenzo dixo esti xueves en declaraciones a los periodistes, que va ser dalgo ""elegante"", ""fino"", ""irónico"", ""moderno"" y ""nuevo"". Asina, invitó a tolos ciudadanos que puean a qu'acudan porque ""va presta-yos"". ""Somos orixinales, ¿que-y vamos facer?"", señaló'l candidatu ""popular"" por Asturies, que nun quixo ""descubrir l'argumentu"" de la obra, anque sí anticipó qu'Arturo Fernández va facer el papel d'un candidatu socialista demientres qu'él s'interpretará a sí mesmu.

Amás aseguró qu'había ""muncha espectación"" énte l'espectáculu y que van treslladase dende l'estranxeru a Uviéu empresarios del mundu del teatru. ""D'ehí vamos salir contrataos pa tol mundu"", afirmó.

Nel anunciu qu'apaez nos distintos medios de prensa escrita estos díes sobre esi mitin espectáculu apaez la semeya d'Arturo Fernández y Gabino de Lorenzo, no que paez imitar el cartelu d'una obra de teatru. Los dos apaecen con smoking y tarabica, mirando a cámara.

Nun ye la primer vez que Gabino de Lorenzo enseña la so afición poles tables en campaña electoral. Nes caberes elecciones municipales, nel mitin que diba dar nel actu central de la campaña, Gabino apaeció mazcaráu y protagonizó un monólogu, ablucando a tolos presentes. Amás ye vezu velu, durante los actos de presentación de la temporada Zarzuela, mazcaráu pa la ocasión, nel pasáu añu de ""caballeru de gracia"".

D'otru llau, el candidatu del Partíu Popular al Congresu por Asturies, criticó duramente les declaraciones d'Álvaro Cuesta nes que dicía que taba faciendo de la campaña electoral ""un cachondeo"", espresando lo que dende'l so puntu de vista ye una falta de sentíu del humor por parte del voceru socialista, al qu'acusó de tener ""la gracia d'una patata cocida""."