Fraga adelanta les elecciones en Galicia

Galicia va escoyer gobiernu nuevu'l 19 de xunu, cuatro meses enantes d'escosar l'actual llexislatura. El presidente gallegu Manuel Fraga fizo oficial la so decisión ayeri dempués de refugar delles vegaes a lo llargo d'estes selmanes la posibilidá de convocar elecciones anticipaes.

La "era Fraga" qu'entamó nel añu 1989, llega al so atapecer con otru güelpe d'efectu al adelantase les elecciones, dalgo que de toos modos, entraba nes quinieles de la oposición. El PSDG-PSOE acusó a Fraga d'adelantar les elecciones por orde de la sede central del PP en Madrid pa tarazar la perda de votos que carez agora mesmo'l PP en Galicia, estremu que niega dafechu'l PP gallegu y el mesmu Fraga, que xustifica l'adelantu pol "clima de crispación" que se vive en Galicia. Pela so parte, el Bloque Nacionalista Galego, segunda fuerza política nes elecciones del 2001, va vese obligáu col adelantu electoral a acelerar el procesu deriváu de la dimisión del so líder históricu Xosé Manuel Beiras. Sicasí, el candidatu nuevu del BNG, Anxo Quintana, declaró que taba mui contentu de que s'adelantaren les elecciones y dixo que "cuanto primero remate l'agonía d'esti gobiernu, meyor". Más proféticu se pon el candidatu socialista López Touriño, qu'anuncia que queden "cincuenta díes pal cambéu en Galicia".

Pela so parte, el PP va volver a presentase con Fraga de candidatu. De ganar el 19 de xunu y llegar a acabar la llexislatura nel añu 2009, l'ex - ministru de turismu de Franco y presidente gallegu dende l'añu 1989, que diz qu'esta va ser la última vegada que se presente, entraría nel llibru guinness de los récords al políticu más vieyu n'activo: Fraga va cumplir los 83 años el 22 payares. Anque'l políticu más veteranu nahistoria foi'l senador norteamericanu Strom Thurmond, que dexó l'escañu con 100 años d'edá, Fraga ta pa valtar la marca del cargu políticu español más vieyu, el dictador Franco, que morrió con 83 años. En cuantes a les crítiques pola so edá, Fraga tienlo mui claro "va poco maté un corzu a 350 metros, lo de la incapacidá ye relativo".

Más información en Vieiros