El Conseyu de Gobiernu aprebó los primeros espedientes toponímicos

El Conseyu de Gobiernu del Principáu d'Asturies aprebó esta mañana los espedientes topononímicos de los conceyos de Carreño, el Franco y Llanes, los trés primeros que se dan de pasu nesta llexislatura.

La Conseyera Ana Rosa Migoya dixo que l'aprobación de los espedientes toponímicos su pón "un pasu importante nel cumplimientu del pautu de gobiernu y na normalización del asturianu" y agradeció-yos a la Xunta de Toponimia y a los sos collaboradores el trabayu desarrolláu pa poder ellaborar estos espedientes, un agradecimientu que la conseyera de cultura y portavoz del gobiernu fizo estensivu a los Conceyos. Ana Rosa Migoya, que dio l'anuncia na so comparecencia na rueda de prensa posterior al Conseyu de gobiernu d'Asturies, dixo que va entamar darréu col unviu de los espedientes a tolos organismos y estayes de gobiernu implicaes na normalización de la toponimia con vistes a la so aplicación efectiva.

Anque l'aprebación de los primeros espedientes toponímicos llega yá a últimos d'abril, depués del plazu que se calculaba, la conseyera adelantó que nes próximes selmanes van seguir aprebándose más espedientes toponímicos. La lista de conceyos que pidieron la revisión de la so toponimia ya llega a los 31, de losque munchos yátienen l'espediente fechu, polo que'l llabor que queda por facer a nivel de tramitación en Conseyu de gobiernu ye grande.

Les primeres reacciones a esta oficialización toponímica vinieron de Ramón d'Andrés. El responsable de la Oficina de Política llingüística comentó a Asturies.com qu'esti ye "un fechu historicu ensin precedentes que ruempe con un tabú y con una trayectoria frustante que llevaba la Xunta de Toponimia dende los años 80" Pa d'Andrés ello supón l'aplicacion d'un aspectu importante del plan de normalización, amás d'una gran alegria personal "al ver convertise en realidá un anhelu de va tirempu". Según d'Andrés "esto nun ye frutu de la casualidá,tamos trabayando con rigor y entusiasmu y ye frutu tamién de la claridá d'idees respecto a esti tema de los responsables politicos, entamando pola Conseyera de cultura, y ye frutu tamién d'un pautu que con toles carencies que tien, da frutos rellumantes como esti". En cuantes a los futuros topónimos a oficializar, d'Andrés comentó que la siguiente tanda de trés conceyos va tar "pa enantes de xunu" y qu'estos van ser L.lena Llangréu y Gozon. La siguiente tanda, con Xixón y Ayer va tener qu'esperar dalgo más. Amás de la mera tramitación d'Andrés asegura que la oficialización de los topónimos ha d'acompañase de la so aplicación, que d'Andrés diz que va facese al traviés d'un procesu paulatín "cosa pa la que contamos con acciones del Plan de Normalización y con campañes informatives a los conceyos". Dende política llingüística cuenten con da-y algame estatal a la retulación colos toponimos nuevos pa qu'esta llegue a les carreteres y instancies titularidá del estáu central amás de les del Gobiernu autonómicu.

Pela so parte, dende la Xunta pola Defensa de la Llingua, a la entruga d'Asturies.com Nacho González, representante de l'asociación, respondió que taben "contentos" de que por fin se diere esti pasu pero espresó tamién el so esmolecimientu porque l'aprebación nun quedare n'algo "de cara a la galería" y porque se-yos diere trámite cuanto primero posible a los 78 conceyos del país.