Dixebra, cabeza de cartel nel 1 de mayu

El colectivu "Fondu Unitariu de Solidaridá Obrera d'Asturies" (FUSOA) presenta güei xueves el conciertu que tradicionalmente vien organizando esta entidá social con motivu de la fiesta del 1 de mayu.

La presentación va ser nel chigre musical "El Barucu" asitiáu na Cai Almacenes de
Xixón, a les 21.30 hores. Nel actu van dase a conocer les bandes que van tocar y les actividaes alternatives que van arrodiar al conciertu. Pa da-y un aquello prestoso al actu, nel Barucu van tar esta nueche'l grupu de hip-hop n'asturianu K-Nalón, que van dar una actuación.


El FUSOA tien un cartel de restallu pal conciertu del 1 de mayu d'anguaño, que va celebrase en La Talaya de Xixón. El grupu avilesín Dixebra son los cabeces d'un cartel nel que tán tamién la renovadora de la tonada asturiana Anabel Santiago, el ska de Skama na Rede y el hip hop de K-Nalón, amás de l'actuación d'un monologuista.

Fuera de lo musical, lo mesmo que na edición 2004 del conciertu, va ponese un mercáu solidariu en el que van participar distintos colectivos. La organización tien puestos a la venta bonos de sofitu pa collaborar colos gastos d'esta iniciativa, en cuantes que nun se cobra entrada por asistir al conciertu. Al preciu de dos euros, los bonos tan a la venta na Tienda de Comerciu Xustu Picu Rabicu, nel Centru Social Sestaferia, bares La Pepita, El Barucu, El Bache, La Folixa y La Xarana de Xixón) y nel Chigre La Gueta de Candás.