Emigración esporta música asturiana col programa “Voces d’un país nel mundu”

Esta mañana presentóse na Conseyería d'Asuntos esteriores el proyectu "Voces d'un país nel mundu" una iniciativa de l'Axencia d'Emigación del Principáu que se define como un amiestu d'elementos de la cultura asturiana d'hoi como son la poesía y la música asturianes.

Cuatro escritores ente los que tan dos de llarga trayectoria como ye'l casu d'Esther Prieto y Pablo Antón Marín Estrada y dos escritores más mozos como son Pablo Texón y Inaciu Galán formen la nómina de lliteratos de la primer edición d'esti programa que cuenta no musical con "Tarañu" y "Deua Dubra" y que va recorrer Bélxica dando una serie de recitales entemeciendo música y poesía col sofitu de l'Axencia d'Emigración y del Centru Asturianu de Bruseles. Los llugares d'esta xira van ser l'Edificiu Asturies de Bruseles -díes 22 y 23 d'abril- el Centru d'Animación de Llingües y el "Kinepolis" dambos na capital belga, -26 y 27 d'abril-.

Igualmente, los escritores van participar en charres cola emigración asturiana na capital d'Europa y van visitar l'Institutu Cervantes onde van dar un recital poéticu. Les emisores belgues impulsaes pola emigración asturiana de segunda xeneración Radio Alma y Radio Si van recoyer tamién les voces y la música d'estos animadores de los asturianos de Bélxica que s'encuadren dientro de la filosofía del Plan d'Emigración 2004-2007 que pretende apoyar a la emigración más necesitada al empar qu'estrenchar los llazos de xuntura cola xente asturiano del esterior.