Trunfu curtiu pal PNV

El Partíu Nacionalista Vascu, en coalición con Eusko Alkartasuna, ganó les elecciones d'ayeri n'Euskadi. Con too y con ello, la formación que lleva gobernando Euskadi dende va 25 años nun va tener mayoría abonda pa facer gobiernu tres d'una votación na que PNV-EA quedaron con 29 escaños (cuatro menos de los que tenía) y perdieron más de 140.000 votos respective al 2001 mientres que PSOE-EE convertióse na segunda fuerza política na comunidá autónoma vasca pasando de trece escaños a 18, mientres que la otra gran fuerza d'ámbitu estatal, el PP, que yera hasta ayeri la segunda fuerza política n'Euskadi reculó hasta quedar en quince escaños (-4).

Sicasí, la noticia d'estes elecciones ta na entrada en parlamentu vascu con nueve escaños del "Partíu Comunista de les tierres vasques" (EHAK, nes sos sigles en vascu) una formación que garró pocos díes enantes d'entamar la campaña electoral testigu de la illegalizada llista d'Auzkera Guztiak, marca cola que concurría de mano a estes elecciones la izquierda abertzale. Esta opción tien, colos sos nueve asientos (2 más qu'Euskal Herritarrok nel 2001 y cuatro perbaxo del tope históricu de Batasuna con 13) un papel fundamental en toles posibles combinaciones pal control del parlamentu vascu, en cuantes que tres d'ella queden con trés escaños Esker Batua-IU, que caltién los sos escaños con perder más de 14.000 votos, y Aralar, qu'entra nel parlamentu vascu per primer vegada na so historia con ún escañu por Guipuzcoa, anque los 28.000 votos conseguíos pol grupu de Patxi Zabaleta tan perbaxo del resultáu de les estatales del añu pasáu, cuando participaron nes elecciones en compañía de Zutik. Unidá Alavesa, pela so parte, desapaez del parlamentu vascu al nun llegar a los votos precisos.

Con estos resultaos queda too abierto con vistes al nomamientu de Lehendakari y formación de gobiernu. Una repetición del tripartitu PNV-EA-EB que gobernó hasta agora nun ye posible en cuantes qu'estes formaciones tienen namás 32 escaños, a 6 de la mayoría absoluta, y ún menos de los 33 que tienen PSOE y PP, que presumiblemente votaríen en contra. Históricamente, el PNV nun tien pautao con Batasuna nin con neguna formación de la izquierda abertzale, pero nin siquiera cola posibilidá d'amestar l'escañu d'Aralar al tripartitu los nacionalistes llegaríen a tener mayoría absoluta nel parlamentu vascu, onde se precisen 38 asientos, colo que sedría preciso contar con EHAK. La posibilidá de reeditar un pautu PNV-PSOE, formaciones que tendríen mayoría absoluta ente elles dos y qe ya gobernaron conxuntamente n'Euskadi, paez otra posibilidá lóxica.


Más información:

Web electoral oficial

El Diario vasco - Gara - Deia - Berria - Euskal Telebista

PNV - PSE-EE - PP Euskadi - Blog d'EHAK (non oficial)- Ezker Batua - IU- Aralar