La policía carga nel aconceyamientu escontra les llinies d'alta tensión

"La concentración protagonizada por diferentes colectivos énte la sede de la Presidencia del Principáu d'Asturies pa protestar polos proyectos de llinies d'alta tensión n'Asturies, acaben con un enfrentamientu ente los manifestantes y la policía, anque a la fin nengún de los primeros resultara deteníu.

L'incidente prodúxose cuando los manifestantes, que teníen torres d'alta tensión simulaes y taben faciendo una representación sobre los peligros de les mesmes, intentaron llevar una d'elles hasta la entrada de la presidencia. Foi nesi momentu cuando los policíes presentes pesllaron les puertes y-yos pidieron que marcharen. Nesi momentu otru grupu de policíes nacionales fueron hacia los manifestantes con violencia, faciendo qu'ún d'ellos cayera al suelu.

La presidenta de la Plataforma ""Picos de la Liebre"" del conceyu d'Ayer, que protesta escontra'l trazáu de la llinia d'alta tensión Sama-Velilla, Marisol Rodríguez, calificó l'actuación policial de ""brutal"" y dixo que los policíes pegaren a una persona ""ensin necesidá dala"".

El colectivu, sofitáu por decenes de persones, aconceyó énte la sede de la Presidencia porque consideren que'l presidente'l Principáu, Vicente Álvarez Areces, ye'l ""máximu responsable"" del trazáu. En pallabres de Marisol Rodríguez ""nosotros nun tamos por un gran negociu enerxéticu que nun dexa más que torgues"". Por eso, apostó por facer oposición y amosar el rechazu al poyectu ""enantes, demientres y dempués"" de les elecciones xenerales del 9 de marzu."