Auna y ONO revuelven el panorama de les telecomunicaciones

Auna y ONO, les dos mayores operadores de telecomunicaciones d'España, tan a piques de fusionase nun operador únicu. La noticia saltó ayeri al conocese al traviés del diariu Expansión de la esistencia d'una ufierta d'ONO Cableuropa por Auna Cable. Los términos de la ufierta entovía nun se conocen, y mientres unes fontes falen de que la ufierta, que tendría un valor de 2.600 millones d'euros, ye namás pola división de cable d'Auna, otres fontes falen d'una gran ufierta por valor d'once mil millones d'euros na qu'ONO mercaría la división de cable d'Auna y tamién la de telefonía movil, qu'opera baxo la marca Amena.

Por de pronto, el Gobiernu español muéstrase al favor de la posible operación, y el secretariu d'Estáu de Telecomunicaciones y pa la Sociedá de la Información Francisco Ros, declaró públicamente qu'operaciones como la posible fusión d'ONO y Auna son «positives» pal sector, amestando que "yá ye tiempu de que s'afite'l mercáu de les telecomunicaciones".

Casu de salir alantre la fusión ente les dos macroplataformes, namás quedaríen en tol estáu trés operadores independientes, que sedríen la gallega R, la vasca Euskaltel y l'asturiana Telecable. La primera tien pel momentu la so independencia asegurada en cuantes que na práctica funciona como una filial d'Unión Fenosa, mientres que la vasca, presidida pol ex - lehendakari José Antonio Ardanza, cuenta col softu del executivu del PNV y de bien de conceyos y instituciones públiques vasques que contraten con ella tolos sos servicios de telecomunicaciones, nuna situación que dacuando llevó a la quexa de les otres empreses de telecomunicaciones, qu'atalanten qu'esiste un marcu de favoritismu hacia la operadora vasca. Con ello, la tercer operadora independiente que queda en xuegu ye l'asturiana Telecable, que dende l'añu pasáu sábese que los nuevos amos d'Hidroeléctrica, la empresa portuguesa EDP, tienen intención de vender. La fusión de les dos mayores operadores del país dexaría al xigante resultante de la operación prácticamente como l'únicu comprador posible pa Telecable.