Ganaderos de la Central amenacen con montar una distribuidora alternativa

La Central Llechera Asturiana vive momentos de tensión ente los sos socios y el cuerpu executivu qu'encabeza Pedro Astals. Un grupu de ganaderos socios de la cooperativa amenacen con dexar la empresa y entamar una distribuidora alternativa de lleche énte la posibilidá de que la directiva los eche de la Central.

La cuerda ente esti grupu de ganaderos y la directiva de la central vien tensando dende va tiempu, llegando la resquiebra a un puntu que yá nun tenía torna en payares del 2004, cuando los ganaderos ficieron una protesta a la puerta de la fábrica de CLAS en Siero pidiendo una xuba del preciu del lleche na que torgaron que la directiva abandonare la fábrica, onde tuvieron los miembros de la xunta rectora de CLAS hasta altes hores de la mañana reteníos por un grupu de socios. La directiva de CLAS pide agora la espulsión de la cooperativa de 13 socios que participaron na protesta.

Casu de salir alantre la denuncia y ser espulsaos, los 13 ganaderos, col sofitu de los cerca de 300 que s'enxerten na Agrupación Independiente de Ganaderos (AIG) grupu qu'encabeza l'ex - vicepresidente de CLAS Jesús Fernández, podríen dexar la cooperativa y entamar los trámites pa crear una empresa de distribución de lleche nueva. Entrín y non, los socios de CLAS piden la mediación del Principáu y de Caxastur, accionista de la Central Llechera dende la so fundación, y faen un llamáu a caltener l'espíritu cooperativista y d'economía social de la Cooperativa contra los intereses especulativos qu'aseguren que mueven a la directiva de la empresa.