Cuesta acusa a De Lorenzo d'apropiase de los símbolos asturianos

"El cabeza de llista del PSOE por Asturies, Álvaro Cuesta, acusó esti miércoles en Mieres al candidatu del PP, Gabino de Lorenzo, d'intentar apropiase de los símbolos asturianos nesta campaña electoral y de pidi-yos a los demás ""pedigrís d'asturianía"". Comentó qu'esi comportamientu supón ""racismu"" dientro d'Asturies. ""A lo meyor piden pedigrís porque tán avezaos a criar perros y caballos"" dixo en rellación a Gabino de Lorenzo.

Cuesta fizo estes declaraciones na so intervención nun actu políticu celebráu nel pabellón del Recintu Ferial de Mieres, nel que tamién intervinieron el cabeza de llista al congresu del PSOE por Sevilla, Alfonso Guerra, el secretariu xeneral de la FSA-PSOE, Javier Fernández, la candidata al Senáu Diana González y l'alcalde de Mieres, Luis María García.

El candidatu socialista dixo que'l PSOE toma ""en serio"" la campaña electoral, énte ""el cachondeo"" de De Lorenzo. ""Ye una falta de respetu a tola ciudadanía"", señaló Cuesta, qu'acusó a la drecha asturiana d'intentar ""patrimonizar"" cuestiones como la llingua asturiana. Pa Cuesta esto nun ye más que recurrir a ""ocurrencies improvisaes y frívoles"" como les propuestes por De Lorenzo del AVE al aeropuertu o l'autopista a Cuadonga.

Pela so parte la candidata al Senáu Diana González cargó tamién escontra l'alcalde d'Uviéu y candidatu del PP, Gabino de Lorenzo, por oponese nel pasáu a proyectos importantes pa les ""comarques"" mineres. Pel so llau Luis María García llamó ""bufón"" al alcalde d'Uviéu y recomendó-y a De Lorenzo que ""respete"" a los electores asturianos."