El Farho Xixón Baloncestu sigue vivu

El Farho Xixón Baloncestu llogró una perimportante victoria por 69-68, que nos caberos segundos pudo ser pal Murcia si Eric Cuthrell llegare a palmiar el tiru que fallare Pedro Sala. Esti trunfu, dempués del de la selmana pasada en Tarragona, fai que l'equipu xixónés seya décimu na clasificación empatáu a victories col octavu, y agora son cuatro los equipos empataos a 15 victories dempués de los resultaos d´esta xornada na que Los Barrios salió derrotáu en Santander y el Cáceres ganó al Plasencia nel enfretamientu extremeñu. Estos resultaos foron los más favoratibles pal Farho Xixón. Destacar la mala actuación de los árbitrios, que perxudicaron al equipu xixonés y qu´a Quique Barcenas perdonáron-y dos técniques pol so comportamientu colos xugadores locales; tamién que dempués de trés partios seguíos ensin xugar un minutu volvió Josep Ortega, prometedor xugador que foi internacional el branu pasáu nel Européu Junior celebráu na República Checa, xugando 1 minutu 14 segundos nel segundu cuartu.


L´equipu xixonés tuvo en ventaya cuasi tol partíu, algamando una separtación nel marcador de 10 puntos nos dos primeros minutos del tercer cuartu. Namás nel últimu cuartu, cuando faltaben 1´39´´, foi cuando`l Murcia se punxo delantre nel marcador con un 63-64 dempués d´una canasta de Pedro Fernández con tiru llibre amestáu por personal de Saúl Blanco. Dempués un triple de Lledó, nel siguiente ataque, una canasta de Fernández, que volvía a poner l´empate a 66, y una personal sobre Saúl Blanco de Cuthrell na que falla un tiru llibre ponen un resultáu de 67-66 a falta de 49 segundos 9 décimes. Nestos últimos segundos van producise tres xugades nes que los locales van a xugar meyor y ganar el partíu, asina una canasta a 18 segundos 5 décimes de Pedro Sala con personal de Vallmajó, anque falla`l tiru llibre, pon un 67-68, Waleskowski recueye`l rebote del tiru llibre y Lledó encesta faltando 6 segundos y pon un 69-68, que va a ser definitivu, pues nel siguiente ataque`l Murcia nun foi a encestar.
El primer periodu foi mui igualáu hasta qu´a 1´40´´ un palméu de Tim Young dempués d´una entrada de Saúl Blanco punxo un 14-8 favoratible a los locales, darréu un triple de Carlos Martínez pal Murcia, una canasta de Saúl Blanco, otra de Manu Gómez con tiru llibre amestáu y una asistencia de Vallmajó a Young dexaron nel llectrónicu un 18-14.
Nel segundu cuartu El marcador siempres foi mui igualáu, moviéndose en diferencies de dos o trés puntos pal Farho Xixón, namás se punxo delantre`l Murcia a cuatro minutos pal final del periodu dempués d´una canasta de Dramec con un 27-28. L´equipu local volvió a ponese con pequeñes ventayes y nel últimu minutu ye cuando llogra separtase hasta los siete puntos finales, con una canasta de Rubén Suárez y un robu de balón de Saúl Blanco qu´encesta Young y q ue dexen un 38-31.


El tercer periodu emtamólu`l Farho Xixón llogrando la másima separtación, con un 41-31 con un triple de Pacreu. Dempués les diferencies moviéronse ente cuatro y ocho puntos pa finar cola mesma diferencia del segundu cuartu, 7 puntos penriba l´equipu asturianu.
Nel últimu cuartu los locales foron delantre nel marcador hasta un empate a 59 cuando faltaben 5´14´´, con triple de Sala pal Murcia. El Farho Xixón llogró ponese nuevamente enriba nel lletrónicu con diferencies de dos y cuatro puntos hasta llegar a esos dos minutos finales que nuevamente supo xugalos l´equipu xixonés y averalu a los puestos que dan derechu a xugar l´ascensu.


El meyor xugador del partíu foi Keith Waleskowski (13 puntos, 20 rebotes, 5 faltes personales recibíes y 31 de valoración), tamién rellumaron nos locales Saúl Blanco (17 puntos, 6 rebotes, 1 mate y 4 faltes recibíes) Tim Young (15 puntos y 4 rebotes) y Jorge Lledó (14 puntos, 3 rebotes y 4 faltes recibíes). Nel Polaris World C. B. Murcia destacar el llabor de Pedro Fernández (19 puntos y 4 rebotes) Pedro Sala (10 puntos y 4 asistencies) y Eric Cuthrell, qu´anque namás metió 4 puntos, garró 13 rebores y recibió 4 faltes personales.

Ficha técnica:

Farho Xixón Baloncestu: Xavi Vallmajó (3), Saúl Blanco (17), Josep Pacreu (3), Keith Waleskowski (13) y Tim Young (15).Tamién xugaron: Jorge Lledó (14), Antxon Iturbe (2), Rubén Suárez (2) y Josep Ortega.
Polaris World

C. B. Murcia: Andre Turner (6), Carlos Martínez (3), Quique Barcenas (10), Manu Gómez (7) y Eric Cuthrell (4). Tamién xugaron: Pedro Fernández (19), Souleymane Dramec (2), Pedro Sala (10), Nuno Oliveira (2), Javier Sánchez Bernat (5).

Árbitrios: David Soto y Jordi Freixa. Elimináu nel Farho Xixón Baloncestu por cinco personales Xavi Vallmajó (minutu 40). El Polaris World C. B. Murcia nun tuvo eliminaos. Unes dos mil persones nel Palaciu los Deportes de la Guía.
Parciales per cuartos: 18-14, 20-17, 16-16 y 15-21.